ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ນັບແຕ່ວັນທີ 13-15 ພຶດສະພານີ້, ບໍລິເວນຄວາມກົດດັນຕ່ຳຂອງອາກາດຮ້ອນຍັງຈະມີກຳລັງປານກາງສືບຕໍ່ແຜ່ປົກຄຸມຢູ່ທົ່ວທຸກພາກຂອງລາວ, ສົມທົບກັບກະແສລົມຕາເວັນຕົກ-ຕາເວັນຕົກສ່ຽງໃຕ້ພັດປົກຄຸມ, ເຮັດໃຫ້ອຸນຫະພູມອາກາດຮ້ອນຢູ່ແຕ່ລະພາກຕື່ມອີກ ແລະ ຈະມີຝົນຕົກຟ້າຄະນອງກະຈາຍ, ພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກເປັນບາງໂອກາດ. ຈາກນັ້ນ ນັບແຕ່ວັນທີ 16-19 ພຶດສະພາ, ບໍລິເວນຄວາມກົດດັນຈະມີກຳລັງອ່ອນລົງເລັກຫນ້ອຍປົກຄຸມຢູ່ທົ່ວທຸກພາກຂອງລາວ, ກະແສລົມຕາເວັນຕົກສ່ຽງໃຕ້ພັດປົກຄຸມເປັນສ່ວນໃຫຍ່, ຊຶ່ງເຮັດໃຫ້ມີຝົນຕົກຟ້າຄະນອງກະຈາຍຫລາຍຂຶ້ນຢູ່ແຕ່ລະພາກ, ນັບທັງນະຄອນຫລວງວຽງຈັນ.
ສະພາບອາກາດໃນໄລຍະນີ້ ຍັງຈະຮ້ອນເອົ້າໃນຕອນກາງເວັນ, ຈາກນັ້ນທ້າຍອາທິດນີ້ຫາຕົ້ນອາທິດໜ້າ ສະພາບອາກາດໂດຍທົ່ວໄປຈະເຢັນລົງເລັກຫນ້ອຍ. ສໍາລັບສະພາບຝົນນັບແຕ່ວັນທີ 13-15 ພຶດສະພານີ້, ຈະມີ ຝົນຕົກຟ້າຄະນອງ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງພາກກາງຫາພາກໃຕ້. ຈາກນັ້ນ ນັບແຕ່ວັນທີ 16-19 ພຶດສະພາ, ຈະມີຝົນຕົກຟ້າຄະນອງຫລາຍຂຶ້ນໃນແຕ່ລະພາກ, ພ້ອມມີລົມພັດແຮງເປັນບາງໂອກາດ.
ແຈ້ງເຕືອນ: ໃນໄລຍະນີ້, ບໍລິເວນຄວາມກົດດັນຕ່ຳຂອງອາກາດຮ້ອນຍັງມີກຳລັງປານກາງປົກຄຸມຢູ່ທົ່ວທຸກພາກຂອງລາວ, ສົມທົບກັບກະແສລົມຕາເວັນຕົກ-ຕາເວັນຕົກສ່ຽງໃຕ້ພັດປົກຄຸມ ແລະ ໃນຕົ້ນອາທິດໜ້າຈະມີຝົນຕົກຟ້າຄະນອງ ພ້ອມມີລົມພັດແຮງເກີດຂຶ້ນຢູ່ຫລາຍທ້ອງຖິ່ນໃນແຕ່ລະພາກ, ດັ່ງນັ້ນ ກົມອຸຕຸນິຍົມ ແລະ ອຸທົກກະສາດ ຈຶ່ງແຈ້ງເຕືອນເຖິງປະຊາຊົນທຸກຊັ້ນຄົນ ຈົ່ງມີສະຕິລະມັດລະວັງຕໍ່ສະພາບຝົນຕົກຟ້າຄະອນອງ, ລົມພັດແຮງໃນໄລຍະນີ້ ແລະ ໃຫ້ຕິດຕາມຂ່າວພະຍາກອນອາກາດເປັນປະຈຳ.
ແຫລ່ງຂ່າວ: ລາວພັດທະນາ