ສຳນັກຂ່າວຕ່າງປະເທດ ລາຍງານໃນວັນທີ 12 ພຶດສະພານີ້ວ່າ ທ້າວ ໂກສິນ ປຣະເສີດສີ ຫລື ໂກໂກ້ ໜຸ່ມໄທອາຍຸ 32 ປີ ເຊິ່ງໄປເຮັດວຽກຢູ່ປະເທດຟິລິບປິນດົນເຖິງ 3 ປີ ໄດ້ຖືກທາງການຟິລິບປິນເນລະເທດອອກຈາກປະເທດແລ້ວ ຫລັງຈາກທີ່ເຂົາໄດ້ໂພສຕ໌ຂໍ້ຄວາມລົງໃນເຟສບຸກ ດ້ວຍການໃຊ້ຖ້ອຍຄຳດູຸຖູກດູແຄນຊາວຟິລິບປິນຢ່າງຮ້າຍແຮງ ໂດຍດ່າຊາວຟິລິບປິນວ່າ ເປັນສັດປະຫລາດທີ່ໂງ່ຈ້າ ເປັນພວກທາດຊັ້ນຕ່ຳ ແລະ ຊົນຊາດທີ່ໄຮ້ຄ່າຢູ່ໃນໂລກ ດັ່ງນີ້ເປັນຕົ້ນ.
ເນື່ອງຈາກໃນວັນທີ 5 ພຶດສະພາຜ່ານມາ ສຳນັກງານກວດຄົນເຂົ້າເມືອງຟິລິບປິນ ໄດ້ແຈ້ງຂໍ້ຫາແກ່ ທ້າວ ໂກສິນ ປຣະເສີດສີ ເຊິ່ງໃຊ້ຊື່ໃນເຟສບຸກວ່າ “Koko Narak” ເປັນບຸກຄົນຜູ້ບໍ່ເພິ່ງປະສົງ ແລະ ຕໍ່ມາທ້າວ ໂກສິນ ໄດ້ອອກມາຂໍໂທດ ພ້ອມທັງລະບຸວ່າເສຍໃຈຕໍ່ການກະທຳດັ່ງກ່າວ ແລະ ບໍ່ມີເຈຕະນາໃນການທຳຮ້າຍຄວາມຮູ້ສຶກຂອງຊາວຟິລິບປິນ ໂດຍຖືວ່າເປັນພຽງການເວົ້າຢອກຊື່ໆ.
ແນວໃດກໍຕາມ ລ່າສຸດທາງການຟິລິບປິນ ໄດ້ເປີດເຜີຍໃນມື້ວານນີ້ (11 ພຶດສະພາ) ວ່າ ທ້າວ ໂກສິນ ປຣະເສີດສີ ພົນລະເມືອງໄທ ໄດ້ຖືກສົ່ງຂຶ້ນເຮືອບິນ ຖ້ຽວບິນຂອງສາຍການບິນໄທ ຕອນເວລາ 20:00 ຂອງວັນທີ 8 ພຶດສະພາຜ່ານມາແລ້ວ.