ນັບແຕ່ຕົ້ນປີ 2015 ເປັນຕົ້ນມາ, ເຈົ້າໜ້າທີ່ປ້ອງກັນຄວາມສະຫງົບຢູ່ຂັ້ນຮາກຖານ ລວມໄປເຖິງໜ່ວຍປ້ອງກັນເຄື່ອນທີ່ຂອງກອງບັນຊາການປ້ອງກັນຄວາມສະຫງົບ ນະຄອນຫລວງວຽງຈັນ ໄດ້ເອົາໃຈໃສ່ເຄື່ອນໄຫວສະກັດກັ້ນ ບັນດາໄວໜຸ່ມກຸ່ມແກ້ງກວນເມືອງທີ່ເຄື່ອນໄຫວກໍ່ກວນຄວາມສະຫງົບສຸກຂອງບ້ານ, ເມືອງໃນນະຄອນຫລວງວຽງຈັນ ແລະ ສາມາດກັກໂຕຜູ້ລະເມີດເຫລົ່ານັ້ນມາສຶກສາອົບຮົມນັບເປັນຫລາຍຄັ້ງແຕ່ບໍ່ເຄັດຫລາບຄື: ໃນຕົ້ນເດືອນພຶດສະພານີ້, ໜ່ວຍງານປ້ອງກັນເຄື່ອນທີ່ ປກສ ນະຄອນຫລວງວຽງຈັນ ໄດ້ທຳການສຶກສາອົບຮົມກຸ່ມແກ້ງກວນເມືອງ ເຂົ້າມາສຶກສາອົບຮົມຈຳນວນ 10 ຄົນ, ໃນນີ້ເປັນຍິງ 3 ຄົນ, ເພື່ອໃຫ້ເຂົາເຈົ້າປ່ຽນແປງ, ກາຍເປັນພົນລະເມືອງດີຂອງຊາດ, ພ້ອມກັນຢຸດຕິການກະທຳທີ່ບໍ່ດີສ້າງຄວາມບໍ່ສະຫງົບໃຫ້ສັງຄົມ. ແຕ່ເຖິງຢ່າງໃດກໍດີ ຕໍ່ບັນຫານີ້ທາງເຈົ້າໜ້າທີ່ຂັ້ນຮາກຖານ ແລະ ອຳນາດການປົກຄອງບ້ານ
ເຫັນວ່າ: ການສຶກສາອົບຮົມກຸ່ມແກ້ງຍັງບໍ່ທັນມີປະສິດທິຜົນເມື່ອພົ້ນອອກຈາກການກັກຂັງ, ປ່ອຍເປັນອິດສະຫລະແລ້ວຜູ້ກະທຳຜິດຍິ່ງມີຄວາມດື້ດ້ານ ແລະ ເຄື່ອນໄຫວຮ້າຍແຮງກວ່າເກົ່າ, ຊຶ່ງບັນຫານີ້ ຂໍໃຫ້ເຈົ້າໜ້າທີ່ກ່ຽວຂ້ອງຈົ່ງພາກັນທົບທວນຄືນວ່າເຮັດແນວໃດກຸ່ມແກ້ງກວນເມືອງທີ່ເປັນໜ້າເກົ່າເຫລົ່ານີ້ ປ່ຽນນິໃສ ແລະ ກາຍເປັນພົນລະເມືອງດີຂອງສັງຄົມ.
ແຫລ່ງຂ່າວ: ລາວພັດທະນາ