ຜູ້​ບັນ​ຊາ​ການ​ຕຳ​ຫລວດ​ແຫ່ງ​ຊາດ​ໄທ ສັ່ງ​ຍ້າຍ 38 ນາຍ​ຕຳ​ຫລວດ ໄປ​ປະ​ຕິ​ບັດ​ໜ້າ​ທີ່​ຢູ່​ສູນ​ປະ​ຕິ​ບັດ​ການ ສຳ​ນັກ​ງານ​ຕຳ​ຫລວດ​ແຫ່ງ​ຊາດ ຫລັງ​ພົບ​ສົບ​ຊາວ​ໂຣ​ຮິງ​ຍາ ໃນ​ພື້ນ​ທີ່​ຂອງ​ພວກ​ກ່ຽວ​ຄວບ​ຄຸມ.

ສຳ​ນັກ​ຂ່າວ INN ຂອງ​ໄທ ລາຍ​ງານ​ໃນ​ວັນ​ທີ 7 ພຶດ​ສະ​ພາ​ນີ້​ວ່າ ທ່ານ ພົນ​ເອກ ສົມ​ຍົດ ພຸ່ມ​ພັນ​ມ່ວງ ຜູ້​ບັນ​ຊາ​ການ​ຕຳ​ຫລວດ​ແຫ່ງ​ຊາດ​ໄທ ໄດ້​ມີ​ຄຳ​ສັ່ງໃນ​ມື້​ວັນ​ທີ 6 ພຶດ​ສະ​ພາ​ຜ່ານ​ມາ ໃຫ້​ພະ​ນັກ​ງານ​ຕຳ​ຫລວດ​ຈຳ​ນວນ 38 ຄົນ ໄປ​ປະ​ຕິ​ບັດ​ໜ້າ​ທີ່​ຢູ່​ສູນ​ປະ​ຕິ​ບັດ​ການ​ສຳ​ນັກ​ງານ​ຕຳ​ຫລວດ​ແຫ່ງ​ຊາດ ໂດຍ​ປົດ​ອອກ​ຈາກ​ຕຳ​ແໜ່ງ​ເດີມ ຈົນ​ກ່​ວາ​ຈະ​ມີ​ຄຳ​ສັ່ງ​ປ່ຽນ​ແປງ ແລະ ໃຫ້​ຜູ້​ບັງ​ຄັບ​ບັນ​ຊາ​ຕົ້ນ​ສັງ​ກັດ​ຂອງ​ນາຍ​ຕຳ​ຫລວດ​ທັງ 38 ຄົນ ອອກ​ຄຳ​ສັ່ງ​ໃຫ້​ຕຳ​ຫລວດຜູ້​ອື່ນ​ໄປ​ຮັກ​ສາ​ການ​ແທນ​ຕຳ​ແໜ່ງ​ດັ່ງ​ກ່າວ.

ທັງ​ນີ້ ເນື່ອງ​ຈາກ​ມີ​ການ​ຄົ້ນ​ພົບ​ຂຸມ​ຝັງ​ສົບ​ຊາວ​ໂຣ​ຮິງ​ຍາ ຈຳ​ນວນ​ກ່​ວາ 30 ຂຸມ ໃນ​ເຂດ​ຕາ​ແສງ​ປາ​ດັງ​ເບ​ຊາ ເມືອງ​ສະ​ເດົາ ແຂວງ​ສົງ​ຂາ ໂດຍ​ຜ່ານ​ການກວດ​ສອບ​ເບື້ອງ​ຕົ້ນ ເຈົ້າ​ໜ້າ​ທີ່​ຂອງ​ໄທ​ເຊື່ອ​ວ່າ ຊາວ​ໂຣ​ຮິງ​ຍາ​ທີ່​ຖືກ​ນຳ​ມາ​ຝັງ​ຖິ້ມ​ໃນ​ພື້ນ​ທີ່​ດັ່ງ​ກ່າວ​ນີ້ ແມ່ນ​ເປັນ​ຝີ​ມື​ຂອງ​ຂະ​ບວນ​ການ​ຄ້າ​ມະ​ນຸດ​ໃນ​ໄທ ເຊິ່ງ​ຈະ​ຕິດ​ຕໍ່​ຂາຍ​ຊາວ​ໂຣ​ຮິງ​ຍາ​ໄປ​ຍັງ​ປະ​ເທດ​ທີ 3 ໂດຍ​ກ່ອນ​ຈະ​ມີ​ການ​ຊື້ – ຂາຍ​ກັນ​ນັ້ນ ຂະ​ບວນ​ການ​ດັ່ງ​ກ່າວ ໄດ້​ນຳ​ໃຊ້​ພື້ນ​ທີ່​ເຂດ​ດັ່ງ​ກ່າວ​ນີ້ ເປັນ​ຄ້າຍ​ກັກ​ຂັງ​ຊົ່ວ​ຄາວ, ປັດ​ຈຸ​ບັນ ທາງ​ການ​ໄທ ກຳ​ລັງ​ຮີບ​ຮ້ອນ​ສືບ​ສວນ​ຄະ​ດີ​ດັ່ງ​ກ່າວ​ນີ້ ທ່າມ​ກາງ​ກະ​ແສ​ການ​ກົດ​ດັນ​ຈາກ​ສາ​ກົນ.