ທະນາຄານຮ່ວມພັດທະນາ ໄດ້ນຳເອົາເງິນຈຳນວນ 310 ລ້ານກີບ ໄປມອບໃຫ້ແກ່ເມືອງ ຫາດຊາຍຟອງ ນະຄອນຫຼວງວຽງຈັນ ເພື່ອນຳໄປຊ່ວຍເຫຼືອບັນເທົາທຸກໃຫ້ແກ່ປະຊາຊົນຜູ້ທີ່ຖືກຜົນ ກະທົບຈາກໄພພິບັດທາງທຳມະຊາດ ລົມພະຍຸລະດູຮ້ອນພັດຖະຫຼົ່ມໃນກາງເດືອນກຸມພາ 2015 ທີ່ຜ່ານມາ ເຮັດໃຫ້ຊັບສິນ ແລະ ເຮືອນຊານເປ່ເພເປັນຈຳນວນຫຼວງຫຼາຍ.
ທ່ານ ບຸນທາມ ພຸດທະວົງສາ ໄດ້ສະແດງຄວາມຂອບໃຈຕໍ່ທະນາຄານຮ່ວມພັດທະນາ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້ ເປັນການປະກອບສ່ວນສຳຄັນໃນການຊ່ວຍເຫຼືອດ້ານມະນຸດສະທຳ ກໍ່ຄືການຊ່ວຍເຫຼືອທຸກຄົນໃນສັງຄົມ ແລະ ຢືນຢັນວ່າເງິນຈຳນວນດັ່ງກ່າວນີ້ຕ້ອງເຖິງມືປະຊາຊົນຜູ້ໄດ້ຮັບ ຜົນກະທົບຢ່າງແນ່ນອນ ທ່ານເຈົ້າເມືອງກ່າວຕື່ມວ່າ ສຳລັບໄພພິບັດທາງທຳມະຊາດທີ່ເກີດຂຶ້ນຄັ້ງນີ້ ໄດ້ສ້າງຄວາມເສຍຫາຍຢ່າງຫຼວງຫຼາຍ ປະຊາຊົນໄດ້ຮັບຜົນກະທົບ 1.400 ຫຼັງຄາເຮືອນ ໃນນັ້ນວັດ 8 ແຫ່ງ ໂຮງຮຽນ 7 ຫຼັງ ພາກສ່ວນທຸລະກິດ 12 ຫົວໜ່ວຍ ລວມທັງຄວາມເສຍຫາຍທາງດ້ານໂຄງລ່າງເສດຖະກິດ ລວມມູນຄ່າຄວາມເສຍຫາຍທັງໝົດ 18 ຕື້ກີບ ໃນນັ້ນ ສະເພາະພາກສ່ວນເອກະຊົນກວມປະມານ 10 ຕື້ກີບ ຢ່າງໃດກໍ່ຕາມຄວາມ ຕ້ອງການທີ່ຈະຟື້ນຟູດ້ານໂຄງລ່າງຂັ້ນພື້ນຖານອັນຮີບດ່ວນ ໃນມູນຄ່າເກືອບ 5 ຕື້ກີບ ມາເຖິງປັດຈຸບັນສາມາດລະດົມທຶນຈາກທົ່ວສັງຄົມໄດ້ປະມານ 1 ຕື້ກວ່າກີບ ຍັງເຫຼືອເກືອບ 4 ຕື້ກີບ ທີ່ຈະສືບຕໍ່ລະດົມທົ່ວສັງຄົມໃຫ້ການຊ່ວຍເຫຼືອ ຈຶ່ງຈະສາມາດແກ້ໄຂໃນເບື້ອງຕົ້ນ.
ພິທີມອບ-ຮັບເງິນຊ່ວຍເຫຼືອຄັ້ງນີ້ ໄດ້ຈັດຂຶ້ນວັນທີ 29 ເມສາ 2015 ທີ່ຜ່ານມາ ຢູ່ຫ້ອງວ່າການປົກຄອງນະຄອນຫຼວງວຽງຈັນ ໂດຍແມ່ນທ່ານ ຄຳຮູ້ ທອງທະວີ ຮອງອຳນວຍການທະນາຄານຮ່ວມພັດທະນາ ເປັນຜູ້ກ່າວມອບ ແລະ ທ່ານ ບຸນທາມ ພຸດທະວົງສາ ເຈົ້າເມືອງຫາດຊາຍຟອງ ເປັນຜູ້ກ່າວຮັບ ໂດຍຊ້ອງໜ້າທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ແລະ ພະນັກງານທີ່ກ່ຽວຂ້ອງທັງສອງຝ່າຍເປັນສັກຂີພິຍານ.
ແຫລ່ງຂ່າວ: ວຽງຈັນໃໝ່