ສຳນັກງານກວດຄົນເຂົ້າເມືອງຟິລິບປິນ ດຳເນີນການກຽມເນລະເທດໜຸ່ມໄທ ທີ່ເຮັດວຽກຢູ່ຟິລິບປິນ ຫລັງຈາກຜູ້ກ່ຽວໂພສຕ໌ຂໍ້ຄວາມທາງເຟສບຸກ ດູຖືກຊາວຟິລິບປິນຫລາຍຢ່າງ.
ສຳນັກຂ່າວຕ່າງປະເທດ ລາຍງານໃນວັນທີ 6 ພຶດສະພານີ້ວ່າ ທ້າວ ໂກສິນ ປຣະເສີດສີ ເຊິ່ງເປັນຄົນໄທທີ່ໄປເຮັດວຽກຢູ່ຟິລິບປິນ ເປັນເວລາ 3 ປີແລ້ວ ກຳລັງຈະຖືກເນລະເທດອອກຈາກປະເທດຟິລິບປິນ ຫລັງຈາກທີ່ເຂົາໄດ້ໄປໂພສຕ໌ຂໍ້ຄວາມລົງທາງເຟສບຸກ ດ້ວຍການໃຊ້ຄຳເວົ້າແບບດູຖູກຊາວຟິລິບປິນໄວ້ຫລາຍຢ່າງເຊັ່ນ: ພວກສັດປະຫລາດທີ່ໂງ່ຈ້າ, ພວກທາດຊັ້ນຕ່ຳ ແລະ ພວກຊົນຊາດທີ່ໄຮ້ຄ່າເທິງໂລກໜ່ວຍນີ້.
ແຫລ່ງຂ່າວໄດ້ລາຍງານວ່າ ເຈົ້າໜ້າທີ່ສຳນັກງານກວດຄົນເຂົ້າເມືອງຟິລິບປິນ (Bureau of Immigration) ໄດ້ດຳເນີນການແຈ້ງຂໍ້ຫາໃຫ້ແກ່ ທ້າວ ໂກສິນ ເຊິ່ງໃສ່ຊື່ທາງເຟສບຸກວ່າ ໂກໂກ້ ໜ້າຣັກ ເປັນບຸກຄົນຜູ້ບໍ່ເພິ່ງປະສົງ ອັນເປັນຂັ້ນຕອນໃນຂະບວນການເນລະເທດຜູ້ກ່ຽວ ອອກຈາກປະເທດຟິລິບປິນແລ້ວ.
ຢ່າງໃດກໍຕາມ ພາຍຫລັງປະເຊີນໜ້າກັບການຈະຖືກເນລະເທດ ທ້າວ ໂກສິນ ໄດ້ອອກມາຂໍໂທດຕໍ່ຊາວຟິລິບປິນ ໂດຍເຂົາໄດ້ລະບຸວ່ານີ້ເປັນພຽງການຢອກຫລິ້ນຊື່ໆ ພ້ອມທັງບອກວ່າ ບໍລິສັດ ຄັອກນິແຊນ ເຊິ່ງເປັນນາຍຈ້າງຂອງເຂົາ ໄດ້ດຳເນີນການລົງໂທດເຂົາແລ້ວ.