ຄວາມສະເຫມີພາບລະຫວ່າງຍິງຊາຍ ເປັນແກນຫລັກຂອງການພັດທະນາເສດຖະກິດແບບໃຫມ່ ສາມາດຍົກລະດັບຈຳນວນຜົນຜະລິດ, ປັບປຸງຜົນໄດ້ຮັບຂອງການພັດທະນາຄົນຮຸ່ນໃຫມ່ໃນອະນາຄົດ; ສະນັ້ນ ການຫລຸດຜ່ອນຄວາມສ່ຽງ ແລະ ເພີ່ມໂອກາດສຳລັບແມ່ຍິງຕ້ອງປັບປຸງຄວາມອາດສາມາດ, ສະຫນັບສະຫນູນຄວາມກ້າວຫນ້າ ແລະ ຍົກລະດັບການເຂົ້າຮ່ວມຂອງແມ່ຍິງໃນການລົງທຶນຂັ້ນພື້ນຖານໂຄງລ່າງໃຫ້ຫລາຍຂຶ້ນ.
ທ່ານ ຈົງ ຈີ ນາຍ ຜູ້ຕາງຫນ້າທະນາຄານພັດທະນາອາຊີປະຈຳລາວ ກ່າວໃນກອງປະຊຸມເຜີຍແຜ່ບົດລາຍງານການປະເມີນຜົນສຳເລັດຄວາມສະເຫມີພາບລະຫວ່າງຍິງຊາຍຂອງ ສປປ ລາວ ວ່າ: ສປປ ລາວ ໄດ້ຮັບຜົນປະໂຫຍດອັນໃຫຍ່ຫລວງຈາກການຂະຫຍາຍຕົວຢ່າງວ່ອງໄວທາງດ້ານເສດຖະກິດຂອງປະເທດດ້ວຍການຫລຸດຜ່ອນຄວາມບໍ່ສະເຫມີພາບລະຫວ່າງຍິງຊາຍ ແລະ ຄວາມດ້ອຍໂອກາດຂອງເຂດຊົນນະບົດ ແຕ່ຍັງມີຄວາມບໍ່ສະເຫມີພາບຈຳນວນຫນຶ່ງຈາກຜົນໄດ້ຮັບຂອງການພັດທະນາມະນຸດ ເຊັ່ນ: ດ້ານສາທາລະນະສຸກ, ການສຶກສາ, ການສະຫນອງນ້ຳສະອາດ ແລະ ດ້ານສຸຂະອະນາໄມ ໂດຍສະເພາະໃນຂົງເຂດທີ່ຫ່າງໄກສອກຫລີກ.
ຢ່າງໃດກໍ່ຕາມ ບັນຫາທີ່ພວມກໍ່ຕົວ ແລະ ຄວາມສ່ຽງອັນໃຫມ່ນີ້ໄດ້ສົ່ງຜົນສະທ້ອນທີ່ແຕກຕ່າງກັນສຳລັບຍິງຊາຍ.
ເພື່ອແກ້ໄຂບັນຫາດັ່ງກ່າວ ຕ້ອງຂະຫຍາຍໂອກາດໃນການມີວຽກເຮັດງານທຳ, ຫລຸດຜ່ອນຊ່ອງວ່າງເຂົ້າເຖິງແຫລ່ງການຜະລິດ, ຫລຸດຜ່ອນຄວາມຮຸນແຮງຕໍ່ແມ່ຍິງ, ປັບປຸງຄວາມອາດສາມາດ, ຊ່ວຍສະຫນັບສະຫນູນຄວາມກ້າວຫນ້າໃນການເປັນຕົວແທນທີ່ເປັນແມ່ຍິງໃຫ້ຫລາຍຂຶ້ນ ທັງໃນກົງຈັກການຈັດຕັ້ງຂອງລັດຖະບານໃນລະດັບຊາດ ແລະ ທ້ອງຖິ່ນ. ເຊິ່ງທະນາຄານພັດທະນາອາຊີ ແລະ ທະນາຄານໂລກມີຄວາມມຸ່ງຫມັ້ນທີ່ຈະເຮັດວຽກຢ່າງສະຫນິດ ແຫນ້ນກັບລັດຖະບານລາວ ເພື່ອສົ່ງເສີມຄວາມສະເຫມີພາບລະຫວ່າງຍິງຊາຍ ແລະ ໃຫ້ສິດແກ່ແມ່ຍິງແນໃສ່ຮັບປະກັນຄວາມກ້າວຫນ້າທີ່ຫນັກແຫນ້ນກ້າວໄປສູ່ການຂະຫຍາຍຕົວ ແລະ ຫລຸດຜ່ອນຄວາມສະເຫມີພາບຂອງຍິງຊາຍໃນທົ່ວ ສປປ ລາວ.
ກອງປະຊຸມຈັດຂຶ້ນໃນວັນທີ 1 ມີນາ 2013 ທີ່ໂຮງແຮມລາວພລາຊາ ເປັນປະທານຂອງທ່ານ ນາງ ເຂັມແພງ ພົນເສນາ ລັດຖະມົນຕີວ່າການປະຈຳຫ້ອງວ່າການລັດຖະບານ, ມີທ່ານ ນາງ ເກອີໂກ ມີວາ ຜູ້ຕາງຫນ້າທະນາຄານໂລກປະຈຳລາວ, ພ້ອມດ້ວຍຕົວແທນຈາກອົງການຈັດຕັ້ງລັດຖະບານ, ຜູ້ໃຫ້ທຶນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທີ່ມາhttp://www.ecom.org.la