ກອງ​ປະ­ຊຸມ​ຄະ­ນະ​ກຳ​ມະການ​ປະ­ສານ​ງານ​ເພື່ອ​ຄວບ​ຄຸມຢາ­ສູບ​ອາ​ຊຽນ ​ຄັ້ງ​ທີ 6 ໄດ້​ຈັດຂຶ້ນ​ລະ­ຫວ່າງ​ວັນ​ທີ 4-6 ພຶດ​ສະພາ 2015 ທີ່​ໂຮງ­ແຮມ​ດອນ​ຈັນ ພາ​ເລດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ຮສ.ດຣ. ບຸນ​ກອງ ສີ​ຫາ​ວົງ ລັດຖະ​ມົນ­ຕີ​ຊ່ວຍ​ວ່າ­ການ​ກະ­ຊວງສາ­ທາ­ລະ­ນະ​ສຸກ ມີ​ຕາງ­ໜ້າ​ຈາກ 10 ປະ­ເທດ​ສະ­ມາ­ຊິກ​ອາ​ຊຽນ ອົງ­ການ​ອະ­ນາ­ໄມ​ໂລກ ປະ­ຈຳລາວ ພ້ອມ​ດ້ວຍ​ບັນ­ດາ​ຂະ­ແໜງການ​ທີ່​ກ່ຽວ­ຂ້ອງ​ເຂົ້າ​ຮ່ວມ.

ຈຸດ­ປະ­ສົງ​ຂອງ​ກອງ​ປະ­ຊຸມຄັ້ງ​ນີ້​ ເພື່ອ​ທົບ​ທວນ​ບັນ­ດາ​ຜົນ​ສຳເລັດ ແລະ ຄວາມ​ກ້າວ­ໜ້າໃນການ­ຈັດ­ຕັ້ງ​ປະ­ຕິ­ບັດ​ແຜນ​ວຽກຈຸດ​ປະ­ສານ​ງານ​ອາ​ຊຽນ ​ວ່າ​ດ້ວຍການ​ຄວບ​ຄຸມ​ຢາ­ສູບ ແລະ ເພື່ອປຶກ­ສາ​ຫາ­ລືໄລ­ຍະ​ຂ້າມ​ຜ່ານ ກ່ຽວ​ກັບ​ບັນ­ດາ​ຈຸດ​ປະ­ສານ​ງານດັ່ງ­ກ່າວ​ຫຼັງ​ປີ 2015 ຕາມ​ແນວທາງ​ແຜນ​ພັດ­ທະ­ນາ​ສາ​ທະ​ລະນະ​ສຸກຂອງ​ອາ​ຊຽນ ແລະ ວາງທິດ​ທາງ ຕໍ່­ໜ້າ​ສຳ­ລັບ​ວຽກ​ງານທີ່​ຍັງ​ຄົງ​ຄ້າງ ນອກ​ນັ້ນຍັງ​ໄດ້​ມີການ​ສົນ­ທະ­ນາ​ແລກ­ປ່ຽນ ແລະ ຖອດ​ຖອນ​ບົດ­ຮຽນ​ຮ່ວມ​ກັນ​ກ່ຽວກັບ​ຜົນ​ໄດ້​ຮັບ​ຈາກ​ກອງ​ປະ­ຊຸມອາ​ຊຽນ ທີ່​ໄດ້​ຈັດ​ຂຶ້ນ​ໃນ​ໄລ­ຍະຜ່ານ​ມາ ບັນ­ດາ​ສິ່ງ​ພົ້ນ​ເດັ່ນ ຂໍ້​ຄົງຄ້າງ ທີ່​ສືບ​ເນື່ອງ​ຈາກ​ກອງ​ປະຊຸມ​ຄະ­ນະ​ກຳ­ມະ­ການ​ປະ­ສານງານເພື່ອ​ຄວບ​ຄຸມ​ ຢາ­ສູບ​ອາຊຽນ​ ຄັ້ງ​ທີ 5 ນອກ​ນັ້ນ​ຍັງ​ໄດ້​ຮັບຟັງ​ບົດ​ສະ­ເໜີ​ຂ່າວ­ສານ ແລະ ຜົນ­ສຳ­ເລັດໃນ​ການ­ຈັດ­ຕັ້ງ​ປະ­ຕິບັດ​ວຽກ​ງານ​ດັ່ງ­ກ່າວ ຈາກ​ອົງການ SEATCA ການ​ນຳ​ສະ­ເໜີ ແລະ ສົນ­ທະ­ນາ​ຮ່ວມ​ກັນ​ກ່ຽວກັບ​ຄວາມ​ກ້າວ­ໜ້າຂອງ​ການ ສ້າງ​ແບບ­ແຜນ​ພັດ­ທະ­ນາ​ສາ​ທາລະ­ນະ​ສຸກ ຫຼັງ​ປີ 2015 ແລະ ໄລຍະ​ຂ້າມ​ຜ່ານ​ຈາກ​ບັນ­ດາ​ຜູ້​ຕາງໜ້າ​ແຕ່​ລະ​ປະ­ເທດ​ໃນ​ອາ​ຊຽນ.