ສຳນັກຂ່າວຕ່າງປະເທດ ລາຍງານໃນວັນທີ 30 ເມສານີ້ວ່າ ມີຜູ້ຊຸມນຸມປະທ້ວງຫລາຍພັນຄົນ ໃນຫລາຍເມືອງຊາຍຝັ່ງຕາເວັນອອກຂອງສະຫະລັດອາເມຣິກາ ໃນມື້ວັນພຸດທີ 29 ເມສາຜ່ານມານີ້ ເພື່ອຮຽກຮ້ອງໃຫ້ຕຳຫລວດ ປະຕິບັດຕໍ່ທຸກຄົນຢ່າງເທົ່າທ່ຽມກັນ ຫລັງຈາກທີ່ເກີດເຫດໄວໜຸ່ມຜິວດຳ ໄດ້ຮັບບາດເຈັບຈົນເສຍຊີວິດ ຈາກການຈັບກຸມຂອງເຈົ້າໜ້າທີ່ຕຳຫລວດ ຢູ່ເມືອງບັນຕິມໍ.
ສູນກາງຂອງການຊຸມນຸມປະທ້ວງ ທີ່ມີຊາວໜຸ່ມອອກມາຫລາຍພັນຄົນ ແມ່ນຢູ່ທີ່ເມືອງບັນຕິບໍ ຈົນເຮັດໃຫ້ເມືອງກາຍເປັນອຳມະພາດ ເນື່ອງຈາກມີການເດີນຂະບວນຜ່ານເຂດໃຈກາງເມືອງ ໂດຍທາງການໄດ້ສັ່ງທະຫານ 2,000 ຄົນ ມາປະຈຳການທົ່ວເມືອງບັນຕິມໍ ເພື່ອຄວບຄຸມສະຖານະການ, ໜັງສືພິມຂອງທ້ອງພິ່ນໄດ້ລາຍງານວ່າ ມີຜູ້ຖືກຈັບກຸມຫລາຍກ່ວາ 200 ຄົນ ໃນມື້ວັນຈັນທີ 27 ເມສາຜ່ານມາ ໂດຍໃນນັ້ນພວກເຂົາໄດ້ຖືກປ່ອຍຕົວແລ້ວຫລາຍກ່ວາເຄິ່ງໜຶ່ງໃນມື້ວານນີ້.
ໃນຂະນະດຽວກັນນັ້ນ, ຢູ່ທີ່ເມືອງນິວຢອກ, ວໍຊິງຕັນ, ບອດສະຕັນ ກໍໄດ້ມີກະແສຄວາມບໍ່ພໍໃຈ ຕໍ່ກັບເຈົ້າໜ້າທີ່ຕຳຫລວດ ໃນການປະຕິບັດຢ່າງບໍ່ເທົ່າທຽມຕໍ່ຄົນຜິວດຳ ເຮັດໃຫ້ຊາວໜຸ່ມຈຳນວນຫລວງຫລາຍ ພາກັນອອກມາໂຮມຊຸມນຸມປະທ້ວງເຊັ່ນດຽວກັນ ໂດຍພວກເຂົາກ່າວວ່າ ຕຳຫລວດໃຊ້ການປະຕິບັດຢ່າງຮຸນແຮງ ແລະ ແບ່ງແຍກຕໍ່ຄົນດຳ ຢ່າງໄຮ້ມະນຸດສະທຳ.
