ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 30 ເມ​ສານີ້​ວ່າ ສະ​ຫະ​ປະ​ຊາ​ຊາດ (UN) ໄດ້​ເປີດ​ເຜີຍຈາກ​ນະ​ຄອນ​ຫລວງ​ກາດ​ມັນ​ດຸ ປະ​ເທດ​ເນ​ປານ​ວ່າ ມີ​ປະ​ຊາ​ຊົນ​ຊາວ​ເນ​ປານ 8 ລ້ານ​ຄົນ ໃນ 39 ເຂດ​ຂອງ​ເນ​ປານ ໄດ້​ຮັບ​ຜົນ​ກະ​ທົບ​ຈາກ​ແຜ່ນ​ດິນ​ໄຫວ ໂດຍ​ມີ​ເຮືອນ​ຊານໄດ້​ຮັບ​ຄວາມ​ເສຍ​ຫາຍ​ປະ​ມານ 7 ໝື່ນ​ຫລັງ ໃນ​ຂະ​ນະ​ທີ່​ຜູ້​ປະ​ສົບ​ໄພ​ໃນ​ພື້ນ​ທີ່​ໃກ້​ຄຽງ​ຈຸດ​ສູນ​ກາງ​ແຜ່ນ​ດິນ​ໄຫວ ຕ້ອງ​ປະ​ເຊີນ​ກັບ​ຄວາມ​ຍາກ​ລຳ​ບາກ ຂາດ​ແຄນ​ອາ​ຫານ, ເຄື່ອງ​ດື່ມ ແລະ ທີ່​ພັກ​ອາ​ໄສ ໂດຍ​ສະ​ເພາະ​ແມ່ນ​ເດັກ​ນ້ອຍ ເຊິ່ງ​ມີ​ຫລາຍ​ເຖິງ 1 ລ້ານ 7 ແສນ​ຄົນ ຈຳ​ຕ້ອງ​ໄດ້​ຮັບ​ການ​ຊ່ວຍ​ເຫລືອ​ຢ່າງ​ຮີບ​ດ່ວນ ໂດຍ​ອົງ​ການ​ສະ​ຫະ​ປະ​ຊາ​ຊາດ ໄດ້​ປະ​ກາດ​ຈະ​ລະ​ດົມ​ເງິນ​ຊ່ວຍ​ເຫລືອ​ຜູ້​ປະ​ສົບ​ໄພ​ໃນ​ເນ​ປານ ເປັນ​ເງິນ 415 ລ້ານ​ໂດ​ລາ ແລະ ຈະ​ສະ​ໜັບ​ສະ​ໜູນ​ລັດ​ຖະ​ບານ​ເນ​ປານ ໄປ​ອີກ 3 ເດືອນ ໃນ​ທຸກ​ພາ​ລະ​ກິດ​ບັນ​ເທົາ​ທຸກ​ຢ່າງ​ຮີບ​ດ່ວນ.