ສາທາລະນະລັດປະຊາຊົນຈີນ ມີພື້ນທີ່ປູກໝາກລະແຊັງໃນປັດຈຸບັນ ສູງກ່ວາປະເທດຝຣັ່ງແລ້ວ ສົ່ງຜົນເຮັດໃຫ້ຈີນກາຍເປັນປະເທດຜູ້ປູກໝາກລະແຊັງ ໃຫຍ່ອັນດັບທີ 2 ຂອງໂລກ ຖັດຈາກແອັດສະປາຍ.
ສຳນັກຂ່າວຕ່າງປະເທດ ລາຍງານໃນວັນທີ 29 ເມສານີ້ວ່າ ຂໍ້ມູນລ່າສຸດເຊິ່ງຖືກເຜີຍແຜ່ໃນມື້ວັນອັງຄານທີ 28 ເມສາຜ່ານມາ ໂດຍອົງການໝາກລະແຊັງ ແລະ ເຫລົ້າແວັງສາກົນ (IOVW) ໃນນະຄອນຫລວງປາຣີ ປະເທດຝຣັ່ງ ໄດ້ຊີ້ໃຫ້ເຫັນວ່າ ພື້ນທີ່ສວນປູກໝາກລະແຊັງໃນຈີນ ເມື່ອນັບມາຮອດທ້າຍປີ 2014 ທີ່ຜ່ານມາ ແມ່ນໄດ້ເພີ່ມຂຶ້ນເປັນ 800,000 ເຮັກຕາ ສົ່ງຜົນເຮັດໃຫ້ຈີນ ຂຶ້ນເປັນປະເທດຜູ້ປູກໝາກລະແຊັງຫລາຍໃຫຍ່ອັນດັບ 2 ຂອງໂລກ ຖັດຈາກປະເທດແອັດສະປາຍ ໃນຂະນະທີ່ຝຣັ່ງເອງ ຖືກຈີນແຊງໜ້າຕົກລົງມາຢູ່ໃນອັນດັບທີ 3.
ຢ່າງໃດກໍຕາມ ເຖິງແມ່ນຈີນຈະມີພື້ນທີ່ປູກໝາກລະແຊັງເປັນອັນດັບ 2 ຂອງໂລກ ແຕ່ດ້ວຍປະລິມານຜົນຜະລິດ ແລະ ຂະບວນການປູກຍັງບໍ່ທັນໄດ້ມາດຕະຖານສູງ ເຮັດໃຫ້ຈີນຍັງຄົງມີຜົນຜະລິດໝາກລະແຊັງ ແລະ ເຫລົ້າແວັງ ອອກສູ່ຕະຫລາດເປັນອັນດັບທີ 7 ຂອງໂລກ ໃນຂະນະທີ່ຝຣັ່ງ ຄອງອັນດັບທີ 1 ແລະ ອີຕາລີ ໄດ້ອັນດັບທີ 2 ຂອງປະເທດທີ່ມີຜົນຜະລິດໝາກລະແຊັງ ແລະ ເຫລົ້າແວັງອອກສູ່ຕະຫລາດໃນໂລກ.
