ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 26 ເຊິ່ງຈັດຂຶ້ນໃນວັນທີ 27 ເມສາ 2015 ທີ່ກົວລາລຳເປີ ແລະ ລັງກາລີ ປະເທດມາເລເຊຍ.
ໃນກອງປະຊຸມ ທ່ານນາຍົກລັດຖະມົນຕີ ທອງສິງ ທຳມະວົງ ໄດ້ຮ່ວມກັບບັນດາຜູ້ນຳອາຊຽນ ທົບທວນຄືນຄວາມຄືບໜ້າ ໃນການສ້າງປະຊາຄົມອາຊຽນໃຫ້ສຳເລັດ ພາຍໃນປີ 2015 ໂດຍສະເພາະແມ່ນ ການຈັດຕັ້ງປະຕິບັດແຜນແມ່ບົດຂອງສາມເສົາຄ້ຳປະຊາຄົມອາຊຽນ (ປະຊາຄົມການເມືອງ-ຄວາມໝັ້ນຄົງອາຊຽນ ປະຊາຄົມເສດຖະກິດອາຊຽນ ແລະ ປະຊາຄົມວັດທະນະທຳ-ສັງຄົມອາຊຽນ) ບັນດາຜູ້ນຳອາຊຽນເຫັນວ່າ ດ້ວຍຄວາມພະຍາຍາມຮ່ວມກັນ ອາຊຽນຈະສາມາດປະກາດການສ້າງປະຊາຄົມອາຊຽນ ໃນທ້າຍປີ 2015 ນີ້.
ບັນດາຜູ້ນຳອາຊຽນ ຍັງໄດ້ສະແດງຄວາມຍິນດີຕໍ່ຄວາມຄືບໜ້າ ໃນການຮ່າງວິໄສທັດປະຊາຄົມອາຊຽນ ຫຼັງ 2015 ແລະ ແຜນປະຕິບັດງານ ເພື່ອຈັດຕັ້ງປະຕິບັດວິໄສທັດດັ່ງກ່າວ ແນໃສ່ສືບຕໍ່ສ້າງປະຊາຄົມອາຊຽນ ໃຫ້ເຂັ້ມແຂງ ແລະ ຈະເລີນກ້າວໜ້າ ອາຊຽນຈະຮ່າງວິໄສທັດດັ່ງກ່າວໃຫ້ສຳເລັດ ເພື່ອໃຫ້ກອງປະຊຸມສຸດຍອດອາຊຽນ ຄັ້ງທີ 27 ໄດ້ພິຈາລະນາຮັບຮອງເອົາໃນທ້າຍປີ 2015 ນີ້.
ບັນດາຜູ້ນຳອາຊຽນ ໄດ້ສະແດງຄວາມຍິນດີຕໍ່ການຮ່ວມມືຂອງອາຊຽນ ກັບບັນດາຄູ່ເຈລະຈາຂອງຕົນ ທີ່ໄດ້ຮັບການເສີມຂະຫຍາຍເທື່ອລະກ້າວ ອັນໄດ້ປະກອບສ່ວນສຳຄັນ ເຂົ້າໃນຂະບວນການສ້າງປະຊາຄົມອາຊຽນ ກໍ່ຄືການປົກປັກຮັກສາ ແລະ ສົ່ງເສີມສັນຕິພາບ ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກໂດຍລວມ ແລະ ເຫັນດີໃຫ້ສືບຕໍ່ເສີມຂະຫຍາຍໝາກຜົນທີ່ຍາດມາໄດ້.
ບັນດາຜູ້ນຳອາຊຽນ ເຫັນວ່າຄວາມເປັນແກນກາງຂອງອາຊຽນມີຄວາມສຳຄັນ ແລະ ເຫັນດີໃຫ້ສືບຕໍ່ຮັດແໜ້ນບົດບາດຄວາມເປັນແກນກາງຂອງອາຊຽນ ໃນໂຄງສ້າງພາກພື້ນ ໂດຍຜ່ານບັນດາກົນໄກທີ່ອາຊຽນເປັນຜູ້ລິເລີ່ມ ຄື: ອາຊຽນ+1 ອາຊຽນ+3 ເວທີພາກພື້ນອາຊຽນ ກອງປະຊຸມລັດຖະມົນຕີປ້ອງກັນປະເທດອາຊຽນບວກ ແລະ ກອງປະຊຸມສຸດຍອດອາຊີຕາເວັນອອກ.
ນອກຈາກນີ້ ບັນດາຜູ້ນຳອາຊຽນ ຍັງໄດ້ປຶກສາຫາລືເພື່ອຊອກຫາວິທີການຮັບມືກັບສິ່ງທ້າທາຍ ທີ່ປະເຊີນໜ້າກັບອາຊຽນ ເຊັ່ນ: ຜົນກະທົບຈາກວິກິດການທາງດ້ານການເງິນ ແລະ ເສດຖະກິດ ການບັນເທົາທຸກໄພພິບັດ ການປ່ຽນແປງຂອງດິນຟ້າອາກາດ ແລະ ໄດ້ແລກປ່ຽນຄຳຄິດເຫັນກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ ທີ່ມີຄວາມສົນໃຈຮ່ວມກັນ.
ກອງປະຊຸມສຸດຍອດອາຊຽນ ຄັ້ງທີ 26 ໄດ້ຮັບຮອງເອົາ 3 ຖະແຫຼງການຄື: ຖະແຫຼງການກົວລາລຳເປີ ວ່າດ້ວຍອາຊຽນຕາມທິດປະຊາຊົນ ແລະ ປະຊາຊົນເປັນແກນກາງ ຖະແຫຼງການລັງກາວີ ວ່າດ້ວຍຂະບວນການເດີນສາຍກາງຂອງໂລກ ແລະ ຖະແຫລງການວ່າດ້ວຍການສ້າງຄວາມພ້ອມຂອງອາຊຽນ ກໍ່ຄືຊຸມຊົນ ແລະ ປະຊາຊົນອາຊຽນ ໃນການຮັບມືກັບໄພພິບັດ ແລະ ການປ່ຽນແປງຂອງດິນຟ້າອາກາດ.
ໃນໂອກາດກອງປະຊຸມສຸດຍອດຄັ້ງນີ້ ບັນດາຜູ້ນຳອາຊຽນຍັງໄດ້ພົບປະກັບ 4 ພາກສ່ວນຄື: ລັດຖະສະພາລະຫວ່າງລັດຖະບານອາຊຽນ (AIPA) ສະພາທີ່ປຶກສາທຸລະກິດອາຊຽນ (ABAC) ບັນດາຜູ້ຕາງໜ້າຊາວໜຸ່ມອາຊຽນ ແລະ ບັນດາຜູ້ຕາງໜ້າອົງການຈັດຕັ້ງສັງຄົມພົນລະເຮືອນອາຊຽນ (CSOs).
ໃນຕອນຄ່ຳຂອງວັນດຽວກັນ ກໍ່ໄດ້ມີພິທີປິດກອງປະຊຸມສຸດຍອດອາຊຽນ ຄັ້ງທີ 26 ຢ່າງເປັນທາງການ ທີ່ເກາະລັງກາວີ ແລະ ພາຍຫຼັງພິທີປິດ ທ່ານນາຍົກລັດຖະມົນຕີ ທອງສິງ ທຳມະວົງ ພ້ອມດ້ວຍຄະນະຜູ້ແທນລາວ ກໍ່ໄດ້ເດີນທາງກັບຄືນສູ່ນະຄອນຫຼວງວຽງຈັນ ດ້ວຍຄວາມສະຫວັດດີພາບ ໂດຍຖ້ຽວບິນພິເສດຂອງສາຍການບິນລາວ.
ສປປ ລາວ ຈະເປັນເຈົ້າພາບ ແລະ ເປັນປະທານອາຊຽນ ໃນປີ 2016 ເຊິ່ງເປັນປີທຳອິດຂອງປະຊາຄົມອາຊຽນ.
ແຫລ່ງຂ່າວ: ວຽງຈັນໃໝ່