ສະຫະປະຊາຊາດ ກຳລັງຂໍອະນຸມັດງົບປະມານສຸກເສີນ ເພື່ອໃຫ້ຄວາມຊ່ວຍເຫລືອຜູ້ປະສົບໄພຈາກແຜ່ນດິນໄຫວໃນປະເທດເນປານ.
ສຳນັກຂ່າວຕ່າງປະເທດ ລາຍງານໃນວັນທີ 28 ເມສານີ້ວ່າ ອົງການສະຫະປະຊາຊາດ ໄດ້ເຮັດໜັງສືຂໍອະນຸມັດງົບປະມານສຸກເສີນຂອງຕົນແລ້ວ ຈຳນວນ 15 ລ້ານໂດລາສະຫະລັດ ເພື່ອໃຫ້ຄວາມຊ່ວຍເຫລືອຜູ້ປະສົບໄພແຜ່ນດິນໄຫວຮຸນແຮງໃນເນປານ ແລະ ເຮັດໃຫ້ມີຜູ້ເສຍຊີວິດແລ້ວ 4 ພັນກ່ວາຄົນ ແລະ ໄດ້ຮັບບາດເຈັບອີກກ່ວາ 7,500 ຄົນ ໂດຍງົບປະມານສຸກເສີນດັ່ງກ່າວນີ້ ຈະສາມາດຈັດຫາບ່ອນພັກອາໄສຊົ່ວຄາວ ແລະ ສິ່ງຂອງອຸປະໂພກ – ບໍລິໂພກທີ່ຈຳເປັນຕ່າງໆ ລວມເຖິງການກໍ່ສ້າງເສັ້ນທາງຊົ່ວຄາວ ເພື່ອລຳລຽງຄວາມຊ່ວຍເຫລືອ ໄປຍັງຜູ້ປະສົບໄພ.
ຂະນະດຽວກັນ ສະຫະປະຊາຊາດໄດ້ປະເມີນໂດຍເບື້ອງຕົ້ນວ່າ ປະຊາຊົນປະມານ 8 ລ້ານຄົນ ໄດ້ຮັບຄວາມເດືອດຮ້ອນຈາກແຜ່ນດິນໄຫວ ໂດຍໃນຈຳນວນນັ້ນ ປະມານ 1.4 ລ້ານຄົນ ຕ້ອງການຄວາມຊ່ວຍເຫລືອດ້ານອາຫານ ໂດຍສະເພາະຜູ້ທີ່ອາໄສໃນບໍລິເວນເມືອງໂພຄາຣາ ສູນກາງຂອງແຜ່ນດິນໄຫວຄັ້ງນີ້ ເຊິ່ງມີຈຳນວນ 750,000 ຄົນ.