ລັດຖະມົນຕີຕ່າງປະເທດອາຊຽນ ເຫັນພ້ອມໂຈະຂໍ້ສະເໜີແນວຄິດການປັບໃຊ້ເຂດເວລາດຽວກັນທົ່ວພາກພື້ນ ຍ້ອນຍັງບໍ່ສາມາດຕົກລົງກັນໄດ້.
ສຳນັກຂ່າວຕ່າງປະເທດ ລາຍງານໃນວັນທີ 27 ເມສາຜ່ານມານີ້ວ່າ ກອງປະຊຸມລັດຖະມົນຕີການຕ່າງປະເທດອາຊຽນ ເຊິ່ງໄຂຂຶ້ນຢູ່ນະຄອນຫລວງກົວລາລຳເປີ ປະເທດມາເລເຊຍ ໃນມື້ວັນທີ 26 ເມສາຜ່ານມານີ້ ໄດ້ຕົກລົງກັນກ່ຽວກັບ ການໂຈະຂໍ້ສະເໜີຂອງມາເລເຊຍ ໃນນາມທີ່ເປັນປະທານອາຊຽນຕາມວາລະໝູນວຽນໃນປີນີ້ ທີ່ສະເໜີຟື້ນຄືນແນວຄິດຂອງກຸ່ມອາຊຽນຜ່ານມາ ໃນການໃຊ້ເຂດເວລາດຽວກັນຂຶ້ນມາຫາລືອີກເທື່ອໜຶ່ງ ໂດຍຂໍ້ສະເໜີດັ່ງກ່າວ ແມ່ນຈະເຮັດໃຫ້ທົ່ວພາກພື້ນອາຊຽນ ໃຊ້ເຂດເວລາ +8 ຈາກມາດຕະຖານກຣີນິດ ເຊິ່ງຢູ່ໃນເຂດເວລາດຽວກັນກັບຈີນ (ໄວກ່ວາເວລາໃນລາວ 1 ຊົ່ວໂມງ) ໂດຍເຊື່ອວ່າການປ່ຽນແປງດັ່ງກ່າວ ຈະນຳມາເຊິ່ງຜົນປະໂຫຍດທາງທຸລະກິດ ຈາກການເຊື່ອມໂຍງຂອງຕະຫລາດ ແລະ ພາກການທະນາຄານ.
ທ່ານ ອານິຟາ ອາມານ ລັດຖະມົນຕີການຕ່າງປະເທດມາເລເຊຍ ໄດ້ກ່າວພາຍຫລັງການຫາລືປະຈຳປີ ຂອງລັດຖະມົນຕີອາຊຽນ ໃນນະຄອນຫລວງກົວລາລຳເປີວ່າ ປະເທດສະມາຊິກກຸ່ມອາຊຽນ ມີຄວາມເຫັນຕ່າງກັນໃນບັນຫານີ້ ແລະ ກອງປະຊຸມໄດ້ຕັດສິນໃຈທີ່ຈະໂຈະບັນຫານີ້ໄວ້ກ່ອນ.
ທັງນີ້ ບັນດາປະເທດໃນສະມາຊິກອາຊຽນທັງ 10 ປະເທດນັ້ນ ແມ່ນນຳໃຊ້ເຂດເວລາທາງການຂອງຕົນແຕກຕ່າງກັນເຊັ່ນ ປະເທດມຽນມາ ໃຊ້ເຂດເວລາ +6:30 ສ່ວນໄທ, ລາວ, ຫວຽດນາມ ແລະ ກຳປູເຈຍ ແມ່ນນຳໃຊ້ເຂດເວລາ +7, ບັນດາປະເທດທີ່ໃຊ້ເຂດເວລາ +8 ແມ່ນໄດ້ແກ່ ຟິລິບປິນ, ມາເລເຊຍ, ບຣູໄນ ແລະ ສິງກະໂປ, ສ່ວນອິນໂດເນເຊຍ ແມ່ນກຳນົດມີຫລາຍເຂດເວລາ ຕັ້ງແຕ່ +7 ຫາ +9 ຈາກເວລາມາດຕະຖານກຣີນິດ.