ສຳນັກຂ່າວຕ່າງປະເທດລາຍງານ ມື້ນີ້ ວັນທີ 27 ເມສາ 2015 ວ່າ ເຈົ້າໜ້າທີ່ໄທສາມາດກວດຢຶດ ງາຊ້າງໄດ້ຫຼາຍກວ່າ 3 ໂຕນ ມູນຄ່າຫຼາຍກວ່າ 50 ຕື້ກີບ ມີປາຍທາງທີ່ປະເທດລາວ ກຽມປະສານຕຳຫຼວດສາກົນ ສືບສວນຫານາຍທຶນທີ່ຢູ່ເບື້ອງຫຼັງ.
ງາຊ້າງຈຳນວນນີ້ປົນມາກັບໃບຊາ ສະແດງເອກະສານເປັນໃບຊາ ຈຳນວນ 11,000 ກິໂລກະລາມ ຕົ້ນທາງຈາກປະເທດເຄນຢາ ທີ່ເຈົ້າໜ້າທີ່ໄທກວດຢຶດໄດ້ ແມ່ນຈາກຕູ້ຄອນເທຣນເນີ ທີ່ມາກັບເຮືອ RHL FELICITAS ເຂົ້າມາພັກທີ່ແຫຼມສະບັງ ປະເທດໄທ ເພື່ອກຽມສົ່ງມາຍັງປະເທດລາວ.
ທ່ານ ພົນເອກ ສະເຫຼີມກຽດ ສີວໍຣະຂານ ຮອງຜູ້ບັນຊາການຕຳຫຼວດແຫ່ງຊາດ (ໄທ) ກ່າວວ່າ ງາຊ້າງຈຳນວນນີ້ຖືເປັນລາຍທີ 2 ໃນອາທິດ ໂດຍໄດ້ປະສານກັບກົມພາສີ ແລະກົມອຸທະຍານແຫ່ງຊາດ ສັດປ່າ ແລະພັນພືດ (ຂອງໄທ) ກວດສອບບໍລິສັດຮັບ-ສົ່ງສິນຄ້າຜ່ານແດນ ທັງຈາກປະເທດໄທແລະບໍລິສັດຂົນສົ່ງໃນປະເທດລາວ ພ້ອມປະສານຕຳຫຼວດສາກົນຕິດຕາມ ຈັບກຸມນາຍທຶນທີ່ຢູ່ເບື້ອງຫຼັງ ແລະເອົາງາຊ້າງທັງໝົດໄປກວດດີເອນເອ ພ້ອມສືບສວນຂະຫຍາຍຜົນທາງລັບ ຂະບວນການຄ້າງາຊ້າງເຫຼົ່ານີ້.