ເກີດເຫດແຜ່ນດິນໄຫວຂະໜາດ 7.5 ຣິກເຕີ ທີ່ປະເທດເນປານ ແຮງສັ່ນສະເທືອນໄກເຖິງອິນເດຍ ຜູ້ເຫັນເຫດການ ບອກວ່າ ອາຄານບ້ານເຮືອນຫຼາຍຫຼັງໃນນະຄອນຫຼວງ ກາດມັນດຸຖະຫຼົ່ມລົງມາ.
ຢູເອັສຈີເອັສ ແຈ້ງວ່າ ແຜ່ນດິນໄຫວເກີດຂຶ້ນເມື່ອເວລາ 13.11 ນາທີ ຂອງວັນທີ 25 ເມສາ 2015 ຕາມເວລາໃນປະເທດລາວ ເຊິ່ງໄວກວ່າເນປານ 1 ຊົ່ວໂມງ 15 ນາທີ ໄກຈາກເມືອງໂປຂຣາ ເມືອງໃຫຍ່ອັນດັບສອງຂອງປະເທດໄປທາງຕາເວັນອອກ 75 ກິໂລແມັດ ແລະຫ່າງໄກຈາກນະຄອນຫຼວງກາດມັນດຸ ໄປທາງຕາເວັນອອກສຽງເໜືອ 77 ກິໂລແມັດ ສູນກາງແຜ່ນດິນໄຫວເລິກພຽງ 11.9 ກິໂລແມັດ.
ດ້ານສຳນັກຂ່າວຣອຍເຕີອ້າງວ່າ ຜູ້ເຫັນເຫດການເລົ່າວ່າ ອາຄານບາງຫຼັງໃນນະຄອນຫຼວງກາດມັນດຸ ຖະຫຼົ່ມລົງມາຍ້ອນແຜ່ນດິນໄຫວ ແລະຮູ້ສຶກເຖິງແຮງສັ່ນສະເທືອນໄດ້ໄກເຖິງນະຄອນຫຼວງ ນິວແດນລີແລະຫຼາຍເມືອງ ທາງເໜືອຂອງອິນເດຍ.
ຫຼ້າສຸດມື້ນີ້ ວັນທີ 26 ເມສາ 2015 ສື່ຕ່າງປະເທດລາຍງານວ່າ ໄດ້ພົບເຫັນຜູ້ເສຍຊີວິດແລ້ວເຖິງ 2,300 ຄົນແລ້ວ ໃນນັ້ນ ລວມທັງ Dan Fredinburg ຜູ້ບໍລິານ Google ເປັນໜຶ່ງໃນຜູ້ປະສົບເຫດ ແລະໄດ້ເສຍຊີວິດລົງແລ້ວ ໂດຍນ້ອງສາວຂອງເຂົາໄດ້ໂພສຂໍ້ຄວາມ ຢືນຢັນຜ່ານອິນສຕາແກຣມ @danfredinburg ວ່າອ້າຍຂອງເຂົາໄດ້ຮັບບາດເຈັບທີ່ຫົວຢ່າງຮຸນແຮງ ຫຼັງປະສົບເຫດຫິມະຖະຫຼົ່ມເທິງຍອດພູ ເອເວີເຣສ ເຊິ່ງເປັນຜົນກະທົບຈາກເຫດແຜ່ນດິນໄຫວ ນັບວ່າເປັນຄວາມສູນເສຍອັນຍິ່ງໃຫຍ່ ຂອງບໍລິສັດ Google ແລະຂອງໂລກ.
