ເມື່ອບໍ່ດົນມານີ້, ເຈົ້າໜ້າທີ່ ປກສ ເມືອງນາຊາຍທອງ ນະຄອນຫລວງວຽງຈັນ ໄດ້ຈັບຕົວທ້າວໄຊຊະນະ ອາຍຸ 23 ປີຢູ່ບ້ານຫ້ວຍຫົງ ເມືອງຈັນທະບູລີ ນະຄອນຫລວງວຽງຈັນ ໃນຂໍ້ຫາລັກຊັບມາດຳເນີນຄະດີ, ພາຍຫລັງຜູ້ກ່ຽວໄດ້ລັກປີນເຂົ້າເຮືອນ ນາງ ຄຳຮັກ, ຜູ້ເປັນແມ່ເຖົ້າຂອງຕົນ ຢູ່ບ້ານດົງຊຽງດີ ເມືອງນາຊາຍທອງ ນະຄອນຫລວງວຽງຈັນ ໃນຕອນເຊົ້າວັນທີ 7 ມີນາ 2015, ໂດຍໄດ້ເງິນ 96 ພັນບາດ (ສະກຸນເງິນໄທ) ແລະ 4 ລ້ານກີບ ແລ້ວຫລົບໜີມາເຮືອນຂອງຕົນ ຈົນມາຮອດວັນທີ 18 ມີນາ 2015 ຈຶ່ງຖືກເຈົ້າໜ້າທີ່ນຳຈັບຕົວມາດຳເນີນຄະດີ ຕາມລະບຽບກົດໝາຍ.
ຜ່ານການສືບສວນ-ສອບສວນຂອງເຈົ້າໜ້າທີ່, ທ້າວໄຊຊະນະ ຮັບສາລະພາບວ່າ: ໄດ້ແຕ່ງງານກັບ ນາງ ເບີ້ຍ ລູກ ສາວນາງ ຄຳຮັກ ແລະ ມາຢູ່ເຮືອນນຳແມ່ເຖົ້າໃນປີ 2014, ພໍຢູ່ໄດ້ປະມານປີໜຶ່ງຕົນກໍເລີ່ມພົວພັນກັບຢາເສບຕິດ ແລະ ມີການຜິດຖຽງ ກັບຄອບຄົວເປັນປະຈຳ ແລ້ວໄດ້ໜີອອກຈາກເຮືອນແມ່ເຖົ້າໄປໄລຍະໜຶ່ງ, ຈາກນັ້ນ ໄດ້ກັບຄືນມາເຮືອນ ແມ່ເຖົ້າ ແລະ ກໍ່ເຫດລັກຊັບຄືດັ່ງກ່າວ.
ແຫລ່ງຂ່າວ: ລາວພັດທະນາ