ລັດ​ຖະ​ບານເກົາ​ຫລີ​ໃຕ້ ​ອະ​ນຸ​ມັດ​ແຜນກຳ​ນົດ​ມື້​ກູ້​ຊາກ​ເຮືອ​ເຊວອນ​ແລ້ວ ໃນ​ເດືອນ​ກັນ​ຍາ​ປີນີ້ ຫລັງ​ເຫດ​ເຮືອ​ຫລົ້ມ​ຜ່ານ​ມາ 1 ປີ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 23 ເມ​ສາ​ນີ້​ວ່າ ລັດ​ຖະ​ບານ​ເກົາ​ຫລີ​ໃຕ້ ໄດ້​ອະ​ນຸ​ມັດ​ແຜນ​ການ​ກູ້​ຊາກ​ເຮືອ​ເຊວອນ​ແລ້ວ ໂດຍ​ກຳ​ນົດ​ເອົາ​ເດືອນ​ກັນ​ຍາ​ປີ​ນີ້ ເຊິ່ງ​ນັບ​ເປັນ​ເວ​ລາ 1 ປີ​ເຄິ່ງ ຫລັງ​ຈາກ​ທີ່​ເກີດ​ເຫດ​ໂສກ​ນາ​ຕະ​ກຳ​ເຮືອ​ລຳ​ດັ່ງ​ກ່າວ​ຫລົ້ມ​ລົງ​ໃນ​ທະ​ເລ ໂດຍ​ລັດ​ຖະ​ບານ​ເກົາ​ຫລີ​ໃຕ້ ໄດ້​ເປີດ​ເຜີຍ​ເລື່ອງ​ດັ່ງ​ກ່າວ ໃນ​ວັນ​ທີ 22 ເມ​ສາ​ຜ່ານ​ມາ​ນີ້​ວ່າ ທາງ​ການ​ຈະ​ເລີ່ມ​ກູ້​ຊາກ​ເຮືອ​ເຊວອນ ເຊິ່ງ​ຄາດ​ວ່າ​ຈະ​ໃຊ້​ເວ​ລາ​ປະ​ມານ 12 – 18 ເດືອນ ກ່​ວາ​ທຸກ​ຢ່າງ​ຈະ​ສຳ​ເລັດ​ສົມ​ບູນ.

ທັງ​ນີ້ ເຮືອ​ເຊວອນ ໄດ້​ເກີດ​ອຸ​ບັດ​ເຫດ​ຈົມ​ລົງ​ໃນ​ທະ​ເລ​ຊາຍ​ຝັ່ງ​ຕາ​ເວັນ​ຕົກ​ສຽງ​ເໜືອ​ຂອງ​ປະ​ເທດ ໃນ​ມື້​ວັນ​ທີ 16 ເມ​ສາ 2014 ທີ່​ຜ່ານ​ມາ ໃນ​ຂະ​ນະ​ທີ່​ຜູ້​ໂດຍ​ສານ​ກຳ​ລັງ​ມຸ່ງ​ໜ້າ​ສູ່​ຣີ​ສອດ​ທາງ​ພາກ​ໃຕ​ຂອງ​ເກາະ​ເຈ​ຈູ ເຊິ່ງ​ຜູ້​ໂດຍ​ສານ​ໂດຍ​ສ່ວນ​ໃຫຍ່ ແມ່ນ​ເດັກ​ນ້ອຍ​ນັກ​ຮຽນ​ມັດ​ທະ​ຍົມ ທີ່​ຈະ​ເດີນ​ທາງ​ໄປ​ທັດ​ສະ​ນະ​ສຶກ​ສາ ໂດຍ​ໂສກ​ນາ​ຕະ​ກຳ​ດັ່ງ​ກ່າວ​ນີ້ ມີ​ຜູ້​ລອດ​ຊີ​ວິດ​ພຽງ​ແຕ່ 174 ຄົນ ເທົ່າ​ນັ້ນ ສ່ວນ​ທີ່​ເຫລືອ​ອີກ 304 ຄົນ​ ແມ່ນ​ເສຍ​ຊີ​ວິດ ແລະ ໃນ​ຈຳ​ນວນ​ດັ່ງ​ກ່າວ​ນີ້ ຍັງ​ບໍ່​ສາ​ມາດ​ເກັບ​ກູ້​ສົບ​ຂຶ້ນ​ມາ​ໄດ້ 9 ສົບ.