ເຈົ້າໜ້າທີ່ກອງມອດໄຟ ແຂວງສະຫວັນນະເຂດ ໃຫ້ຮູ້ວ່າ: ໃນເວລາປະມານ 15:20 ໂມງຂອງວັນທີ 20 ເມສານີ້, ໄດ້ເກີດໄຟໃໝ້ກຸຕິວັດ, ບ້ານນາເຕີຍ, ເມືອງໄກສອນ, ແຂວງສະຫວັນນະເຂດ, ເຊິ່ງເປັນກຸຕິ 2 ຊັ້ນໄມ້ເທິງ-ລຸມກໍ່ ໄດ້ຮັບຄວາມເສຍຫາຍໝົດກ້ຽງ. ພາຍຫລັງເຈົ້າໜ້າທີ່ໄດ້ຮັບແຈ້ງກໍຮີບລົງໄປຈຸດເກີດເຫດໂດຍໃຊ້ລົດນ້ຳດັບເພີງຫລາຍຄັນ ແລະ ເຈົ້າໜ້າທີ່ຈຳນວນໜຶ່ງເຂົ້າຄວບຄຸມເພີງໄວ້ໄດ້ໃນເວລາຕໍ່ມາ, ໂຊກດີບໍ່ມີຜູ້ໄດ້ຮັບບາດເຈັບຫລືເສຍຊີວິດ. ສ່ວນສາເຫດ ແລະ ມູນຄ່າຄວາມເສຍຫາຍຂອງການເກີດເຫດຄັ້ງນີ້ ຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່. ແຕ່ເຖິງຢ່າງໃດກໍຕາມໃນໄລຍະນີ້ ອາກາດຮ້ອນອົບເອົ້າຈົ່ງລະມັດລະວັງການໃຊ້ເຄື່ອງໄຟຟ້າ ແລະ ອຸປະກອນຕ່າງໆທີ່ສາມາດເກີດໄຟໄດ້ງ່າຍ, ທັງນີ້ ກໍເພື່ອຫລີກລ້ຽງອັກຄີໄພທີ່ຈະເກີດຂຶ້ນໄດ້ທຸກເວລາ, ພ້ອມກັນນີ້ ກໍຝາກເຕືອນມາຍັງປະຊາຊົນທີ່ຍັງນຳໃຊ້ສາຍໄຟເກົ່າຢູ່ນັ້ນ, ໃຫ້ກວດກາ ແລະ ປ່ຽນຖ່າຍໃໝ່ກ່ອນເຫດການທີ່ບໍ່ຄາດຄິດຈະເກີດຂຶ້ນ.
ແຫລ່ງຂ່າວ: ລາວພັດທະນາ