ຂປລ. ໃນຕອນແລງຂອງວັນທີ 19 ເມສາ 2015 ຢູ່ຫ້ອງວ່າການລັດຖະບານ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ ໄດ້ໃຫ້ກຽດຕ້ອນຮັບ ການເຂົ້າຢ້ຽມຄຳນັບຂອງ ທ່ານ ລີຈ້ຽນ ຫົວໜ້າກົມການບິນ ພົນລະເຮືອນ ສປ ຈີນ ແລະ ຄະນະ ໃນໂອກາດທີ່ເດີນທາງ ມາເຄື່ອນໄຫວເຮັດວຽກ ແລະ ຢ້ຽມຢາມລາວ.
ທ່ານ ສົມສະຫວາດ ເລັ່ງສະຫວັດ ໄດ້ຕີລາຄາສູງ ຕໍ່ການເດີນທາງມາເຮັດວຽກ ຂອງຄະນະຜູ້ແທນ ກົມການບິນ ພົນລະເຮືອນຈີນ ໃນເທື່ອນີ້. ອັນເປັນການ ເສີມຂະຫຍາຍ ສາຍພົວພັນ ການຮ່ວມມືຍຸດທະສາດ ຂອງສອງປະເທດ ກໍຄືສອງກົມ ການບິນ ລາວ-ຈີນ ໂດຍສະເພາະ ການທີ່ຈະຊື້ເຮືອບິນ ມາດຕະຖານຈາກ ສປ ຈີນ ເພື່ອນຳມາບໍລິການຢູ່ ສປປ ລາວ ແລະ ການຮ່ວມມືກັນ ກໍຄືການບໍລິການຫລັງການຂາຍ ເພື່ອພ້ອມກັນສ້າງ ໃຫ້ເປັນມາດຕະຖານໃໝ່ ທີ່ມີຊື່ສຽງ ແລະ ສາກົນໃຫ້ ການຍອມຮັບ, ອີກດ້ານໜຶ່ງ ໃນເງື່ອນໄຂ ຂອງການເຊື່ອມໂຍງ ທັງໃນພາກພື້ນ ແລະ ສາກົນ ພວກເຮົາຍິ່ງຕ້ອງໄດ້ມີ ການຮ່ວມມືກັນ ຢ່າງສະໜິດແໜ້ນ ເພື່ອປະກອບສ່ວນ ໃຫ້ແກ່ການໄປມາຫາສູ່ກັນ ມີຄວາມຄ່ອງຕົວຂຶ້ນ ແລະ ເຮັດໃຫ້ການພັດທະນາ ເສດຖະກິດ-ສັງຄົມ ມີການຂະຫຍາຍຕົວຂຶ້ນເປັນກ້າວໆ. ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຫວັງວ່າ ກົມການບິນ ພົນລະເຮືອນຈີນ ຈະໃຫ້ການຊ່ວຍເຫລືອ ຝ່າຍລາວຢ່າງຕັ້ງໜ້າ ທັງການພັດທະນາ ຊັບພະຍາກອນມະນຸດ ກໍຄືການຮ່ວມມືຊ່ວຍເຫລືອ ດ້ານອື່ນໆ ຂອງກົມການບິນພົນລະເຮືອນລາວ ໃຫ້ໄດ້ຮັບການພັດທະນາ ຂຶ້ນໄປເລື້ອຍໆ.
ທ່ານ ລີຈ້ຽນ ຕາງໜ້າຄະນະກົມການບິນ ພົນລະເຮືອນ ສປ ຈີນ ໄດ້ກ່າວສະແດງຄວາມຂອບໃຈ ຕໍ່ທ່ານຮອງນາຍົກ ທີ່ໃຫ້ກຽດຕ້ອນຮັບ ໃນການເຂົ້າຢ້ຽມຄຳນັບ ຄັ້ງນີ້ ພ້ອມທັງ ໄດ້ແຈ້ງຈຸດປະສົງ ຂອງການຢ້ຽມຢາມ ແລະ ຜົນການພົບປະສອງຝ່າຍ ໃຫ້ທ່ານຮອງນາຍົກຊາບ.
ແຫລ່ງຂ່າວ: ສຳນັກຂ່າວສານປະເທດລາວ