*(ຂປລ): ສະຫາຍ ​ເຮ​ໂຣນີ​ໂມ ​ເດ ຊູ​ຊາ (Jeronimo de Sousa), ​ເລຂາທິການ​ໃຫຍ່ ພັກ​ກອມ​ມູນິດ​ປອກຕຸຍ​ການ ພ້ອມ​ຄະນະ​ ໄດ້​ເດີນທາງມາຢ້ຽມຢາມ ສປປ ລາວ ​ແຕ່​ວັນ​ທີ 25/2 ຫາ 1/3/2013. ​ໃນ​ໂອກາດ​ນີ້ ​ເມື່ອ​ຕອນ​ເຊົ້າວັນ​ທີ 26 ກຸມພາ 2013 ນີ້ ສະຫາຍ ບຸນ​ປອນ ບຸດ​ຕະນະ​ວົງ, ກຳມະການ​ກົມ​ການ​ເມືອງ, ຄະນະເລຂາທິການ​ສູນ​ກາງ​ພັກ, ຫົວໜ້າ​ຫ້ອງ​ວ່າການ​ສູນ​ກາງ​ພັກ ​ໄດ້​ຕາງໜ້າ​ໃຫ້​ສູນ​ກາງ​ພັກ ປປ ລາວ ພົບ​ປະ​ເຮັດ​ວຽກ​ກັບ ສະຫາຍ ​ເຮ​ໂຣນີ​ໂມ ​ເດ ຊູ​ຊາ.

​ໃນ​ການ​ພົບ​ປະ ທັງ​ສອງ​ຝ່າຍ​ໄດ້​ແຈ້ງ​ໃຫ້​ກັນຊາ​ບ ກ່ຽວ​ກັບ​ສະພາບ​ການພົ້ນ​ເດັ່ນ ກໍ​ຄື​ ບົດ​ຮຽນ​ໃນ​ການຈັດຕັ້ງປະຕິບັດ, ການ​ເຄື່ອນ​ໄຫວ​ຊີ້ນຳ​ນຳພາ ຂອງ​ແຕ່​ລະ​ພັກ, ​ແຕ່ລະ​ປະ​ເທດ ​ໃນ​ປະຈຸ​ບັນ; ຄະນະ​ຜູ້​ແທນ​ພັກ​ກອມ​ມູນິດ ປອກຕຸຍ​ການ ​ໄດ້​ມີ​ຄວາມ​ສົນ​ໃຈ ​ແລະ ​ໃຫ້ການ​ຍ້ອງຍໍ​ຊົມ​ເຊີຍ ຕໍ່​ການ​ນຳພາ​ຂອງ​ພັກ ​ແລະ ລັດ​ເຮົາ ​ໃນ​ການ​ພັດທະນາ​ເສດຖະກິດ-ສັງຄົມ ​ແລະ ການ​ແກ້​ໄຂ​ຄວາມທຸກ​ຍາກ ຕາມ​ແນວທາງ​ນະ​ໂຍບາຍ​ປ່ຽນ​ແປງ​ໃໝ່ ເປັນຕົ້ນ​ແມ່ນ​ການຈັດຕັ້ງປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງທີ IX ຂອງ​ພັກ.

ນອກ​ນັ້ນ ທັງ​ສອງ​ຝ່າຍ​ຍັງ​ໄດ້​ແລກປ່ຽນ​ບົດຮຽນ ກ່ຽວ​ກັບ​ວຽກ​ງານ​ການ​ເຄື່ອນ​ໄຫວ ​ຂອງ​ແຕ່​ລະ​ພັກ, ບັນຫາ​ພາກພື້ນ ​ແລະ ສາກົນ ທີ່​ຕ່າງ​ຝ່າຍ​ມີ​ຄວາມ​ສົນ​ໃຈ, ທົບ​ທວນ​ຄືນ​ການ​ພົວພັນ ລະຫວ່າງ​ ສອງ​ພັກ​ໃນ​ໄລຍະ​ຜ່ານ​ມາ ​ແລະ ທິດ​ທາງ​ການ​ພົວພັນ​ຮ່ວມ​ມື​ໃນຕໍ່ໜ້າ. ພ້ອມ​ນີ້ ສະຫາຍ ບຸນ​ປອນ ບຸດ​ຕະນະ​ວົງ ​ໄດ້​ຕີ​ລາຄາ​ສູງ ​ແລະ ຊົມ​ເຊີຍ​ຕໍ່​ການ​ມາ​ຢ້ຽມຢາມ ສປປ ລາວ ຂອງ​ຄະນະ​ຜູ້​ແທນ​ດັ່ງກ່າວ ອັນ​ເປັນ​ການ​ປະກອບ ສ່ວນ​ສຳຄັນ ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ທີ່​ມີ​ມູນ​ເຊື້ອ ລະຫວ່າງ ສອງ​ພັກ, ​ເພື່ອ​ຜົນ​ປະ​ໂຫຍ​ດຂອງ​ສັນຕິພາບ, ມິດຕະພາບ ​ແລະ ການ​ຮ່ວມ​ມື​ໃນ​ພາກພື້ນ ​ແລະ ສາກົນ.

ສະຫາຍ ​ເຮ​ໂຣນີ​ໂມ ​ເດ ຊູ​ຊາ ກໍ​ໄດ້​ສະ​ແດງ​ຄວາມ​ດີ​ໃຈ ທີ່​ໄດ້​ມີ​ໂອກາດ​ມາ​ຢ້ຽມຢາມ ສປປ ລາວ ເປັນຄັ້ງທຳ​ອິດ, ​ໄດ້​ມາ​ເຫັນ​ຜົນສຳ​ເລັດ ​ໃນ​ການ​ພັດທະນາຂອງ​ປະຊາຊົນ​ລາວ ພາຍ​ໃຕ້​ການ​ນຳພາອັນ​ຖືກຕ້ອງ ​ແລະ ປີ​ຊາ​ສາມາດ ຂອງ​ພັກ ປປ ລາວ ​ແລະ ຂໍ​ອວຍພອນ​ໃຫ້​ປະຊາຊົນ​ລາວ ຈົ່ງ​ປະສົບ​ຜົນ​ໃສຳ​ເລັດ​ໃໝ່ໃຫຍ່​ຫລວງ​ກວ່າ​ເກົ່າ ​ໃນ​ການ​ພັດທະນາ​ ສ້າງສາ​ປະ​ເທດ​ຊາດ.

​ໃນ​ໄລຍະຢູ່​ຢ້ຽມຢາມ ສປປ ລາວ ຄັ້ງນີ້ ຄະນະ​ຜູ້​ແທນ​ຂັ້ນສູງ ພັກ​ກອມ​ມູນິດ ປອກຕຸຍ​ການ ​ຍັງໄດ້​ໄປ​ຢ້ຽມສະຖານ​ທີ່​ປະຫວັດສາດ ​ແລະ ວັດທນນະ​ທຳ​ ຈຳນວນ​ໜຶ່ງຢູ່​ນະຄອນ ຫລວງ​ວຽງ​ຈັນ ​ແລະ ​ເມືອງ​ມໍລະດົກ​ໂລກ ​ແຂວງ​ຫລວງ​ພະ​ບາງ

ທີ່ມາhttp://www.kpl.net.la