ສະພາການຄ້າສະຫະລັດອາເມຣິກາ ຊຸກດັນລັດຖະບານຮີບຢຸດຕິການຂວ້ຳບາດຕໍ່ປະເທດກູບາ
ທ່ານ ໂທມັສ ໂດນາຮິວ ປະທານສະພາການຄ້າສະຫະລັດອາເມຣິກາ ເຊິ່ງຕໍ່ຕ້ານການຂວ້ຳບາດການຄ້າຕໍ່ກູບາມາຕັ້ງແຕ່ດົນ ໄດ້ເປີດເຜີຍຢູ່ເມືອງປານາມາ ຊິຕີ້ ປະເທດປານາມາ ກ່ອນທີ່ຈະເຂົ້າຮ່ວມກອງປະຊຸມສຸດຍອດອາເມຣິກາ ລະຫວ່າງວັນທີ 10-11 ເມສາ ເຊິ່ງມີລະດັບຜູ້ນຳທັງ 35 ປະເທດ ເຂົ້າຮ່ວມ ລວມທັງປະທານາທິບໍດີ ບາຣັກ ໂອບາມາ ແຫ່ງສະຫະລັດອາເມຣິກາ ແລະ ປະທານາທິບໍດີ ຣາອູນ ກາສະໂຕຣ ແຫ່ງກູບາວ່າ ພັກຝ່າຍຄ້ານຣິພັບພລິກັນ ຄວນຖອນຂວ້ຳບາດການຄ້າຕໍ່ກູບາ ແລະ ເຊື່ອວ່າເຮັດໄດ້ກ່ອນການເລືອກຕັ້ງປະທານາທິບໍດີສະຫະລັດໃນປີໜ້າ. ທັງນີ້, ທ່ານໂອບາມາ ໄດ້ຫລຸດຜ່ອນມາດຕະການຫ້າມຄ້າຂາຍກັບກູບາແລ້ວໃນບາງສ່ວນ ພ້ອມທັງຂໍໃຫ້ລັດຖະສະພາອາເມຣິກາ ຮ່ວມມືກັນຍົກເລີກການຂວ້ຳບາດດັ່ງກ່າວ ແຕ່ຊ້ຳພັດຖືກກະແສຄັດຄ້ານຈາກສະມາຊິກພັກຣິພັບພລິກັນ ທີ່ຄອບຄອງສຽງສ່ວນຫລາຍແລ້ວໃນສະພາຜູ້ແທນ.
ຂະນະດຽວກັນ ທ່ານ ໂອບາມາ ແລະ ທ່ານ ກາສະໂຕຣ ກຽມພົບກັນໃນກອງປະຊຸມສຸດຍອດັ່ງກ່າວນີ້ເປັນຄັ້ງທຳອິດ ໃນຂະນະທີ່ທາງການກະຊວງການຕ່າງປະເທດສະຫະລັດ ຢູ່ລະຫວ່າງການຕັດສິນໃຈວ່າ ຈະຍົກກູບາອອກຈາກບັນຊີລາຍຊື່ສະໜັບສະໜູນກຸ່ມກໍ່ການຮ້າຍ ຫລື ບໍ່ ເຊິ່ງຖ້າຫາກຕັດສິນໃຈຍົກກູບາອອກແລ້ວ ສະພາຜູ້ແທນສະຫະລັດ ກໍຈະມີເວລາ 45 ວັນ ໃນການລົງມະຕິເຫັນດີ ຫລື ບໍ່ເຫັນດີ.