ເທິງດວງຕາເວັນມີຈຸດຳໆ ເຊິ່ງຖ້າເບິ່ງ(ຜ່ານກ້ອງສະເພາະ) ຈະເຫັນຄ້າຍໆຄືເກາະຢູ່ກາງທະເລ ຄວາມຈິງແລ້ວ ຈຸດເຫຼົ່ານີ້ຈະເປັນເກາະໄປບໍ່ໄດ້ ເພາະດວງຕາເວັນນັ້ນຮ້ອນເຖິງ 5,515 ອົງສາ ເຊິ່ງເກີນກວ່າເກາະຈະຢູ່ໄດ້ ດວງຕາເວັນຮ້ອນຈົນທຸກສິ່ງທຸກຢ່າງ ໃນໂຕມັນແລະທຸກສິ່ງທີ່ຢູ່ເທິງມັນ ຈະລະລາຍກາຍເປັນແກ໊ສໄປໝົດ ໃນຂະນະທີ່ແກ໊ສເຊິ່ງຮ້ອນກຳລັງປິ່ນອ້ອມ ແກ໊ສທີ່ເຢັນກວ່າແລະນິ້ງກວ່າກໍຈະກໍ່ໂຕຂຶ້ນ ເປັນແຜ່ນໃຫຍ່ ນີ້ແຫຼະຄືຈຸດດຳໆ ໃນດວງຕາເວັນ.
ເຮົາຍັງຕ້ອງຮຽນຮູ້ອີກຫຼວງຫຼາຍ ກ່ຽວກັບຈຸດເທິງດວງຕາເວັນ ນັກວິທະຍາສາດຄົ້ນຄວ້າຮູ້ວ່າ ເທິງດວງອາທິດມີພາຍຸໄຟຟ້າ ອັນມະຫຶມາເກີດຂຶ້ນ ບາງເທື່ອພາຍຸເຫຼົ່ານີ້ຈະເຮັດໃຫ້ເກີດ ຈຸດດຳໆເຊິ່ງຈະຄົງຢູ່ດົນໄດ້ເປັນເດືອນ ຫຼືຫຼາຍກວ່ານັ້ນກໍໄດ້ ກ່ອນທີ່ມັນຈະສະຫຼາຍໂຕໄປ ຫຼືເຄື່ອນຜ່ານຜິວດວງຕາເວັນໄກອອກໄປ ຈົນເບິ່ງບໍ່ເຫັນ.
ຄ້າຍຄືວ່າຈະມີຈຸດໃນດວງຕາເວັນ ປາກົດຫຼາຍໆຄັ້ງໜຶ່ງໃນທຸກຮອບ 11 ປີ ແຕ່ກໍບໍ່ມີໃຜຮູ້ແທ້ຮູ້ຈິງວ່າ ເປັນຫຍັງມັນຈຶ່ງເປັນແນວນັ້ນ ເຮົາຮູ້ກັນວ່າ ມີສັນຍານວິທະຍຸ ອັນມີພະລັງມາຈາກດວງຕາເວັນ ໃນໄລຍະທີ່ກຳລັງເກີດພາຍຸໄຟຟ້າ ສັນຍານເຫຼົ່ານີ້ເປັນເຄື່ອງຂັດຂວາງ ຕໍ່ການສົ່ງຄື້ນວິທະຍຸໂທລະທັດເທິງໂລກ.