ຊາວໄຕ້ຫວັນຢູ່ນະຄອນຫລວງໄທເປ ແລະ ຫລາຍເມືອງທາງພາກເໜືອ ພົບພາວະແຫ້ງແລ້ງໜັກ ຈົນຕ້ອງຢຸດຈ່າຍນ້ຳປະປາໃຫ້ແກ່ປະຊາຊົນ.
ສຳນັກຂ່າວຕ່າງປະເທດ ລາຍງານໃນວັນທີ 8 ເມສານີ້ວ່າ ຊາວໄຕ້ຫວັນຕ້ອງປະເຊີນກັບພາວະແຫ້ງແລ້ງໜັກ ເຖິງຂັ້ນທາງການຕ້ອງໄດ້ໃຊ້ມາດຕະການງົດຈ່າຍນ້ຳປະປາ 2 ມື້ຕໍ່ອາທິດ ໃນຫລາຍເມືອງທາງພາກເໜືອຂອງໄຕ້ຫວັນ ຫລັງຈາກປີນີ້ມີຝົນຕົກໃນໄຕ້ຫວັນ ໃນປະລິມານໜ້ອຍທີ່ສຸດໃນຮອບ 70 ປີ ຫລື ເຮັດໃຫ້ລະດັບນ້ຳໃນອ່າງເກັບນ້ຳເໜືອເຂື່ອນ ຫລຸດລົງຕ່ຳກ່ວາປົກກະຕິ.
ພື້ນທີ່ທີ່ໄດ້ງົດຈ່າຍນ້ຳປະປາ 2 ມື້ຕໍ່ອາທິດນັ້ນ ແມ່ນໄດ້ແກ່ ນະຄອນຫລວງໄທເປ, ເມືອງເຕົ້າຢວນ ແລະ ເຂດຊິນສູ ເຊິ່ງເປັນເກາະຢູ່ທາງພາກເໜືອ, ລາຍງານຂ່າວໄດ້ລະບຸວ່າ ປະລິມານນ້ຳໃນອ່າງເກັບນ້ຳຊິເໝິນ ຫລຸດລົງເຫລືອພຽງແຕ່ 24.56% ຂອງຄວາມຈຸອ່າງເທົ່ານັ້ນ ເຊິ່ງຖືວ່າເປັນປະລິມານນ້ຳຕ່ຳທີ່ສຸດ ໂດຍປະຊາຊົນທີ່ອາໄສໃນພື້ນທີ່ທາງພາກເໜືອ ໄດ້ຮັບຄຳແນະນຳຈາກທາງການ ໃຫ້ໃຊ້ພາຊະນະສຳຮອງເກັບກັກນ້ຳໄວ້ ສຳລັບໄວ້ໃຊ້ປຸງແຕ່ງອາຫານ, ຊັກລ້າງ ແລະ ໃນຫ້ອງນ້ຳ.