ປີມະແມ-ຮັບມົດ-ສັຕຕະສົກ-ອະທິກະມາສ, ພສ2557-2558, ຈສ1376-1377, ຄສ2015

ວັນສັງຂາຣລ່ວງ : ວັນອັງຄານ (ມື້ກົດສັນ) ແຮມ 11 ຄ່ຳ ເດືອນ 5 , ພສ 2557 ກົງກັນວັນທີ່ 14 ເມສາ 2015
ເວລາ 14ໂມງ 24 ນາທີ 00 ວິນາທີ…ຯ
ວັນສັງຂາຣເນົາ : ວັນພຸດ (ມື້ຮ້ວງມົດ) ແຮມ 12 ຄ່ຳ ເດືອນ 5 , ພສ 2557 ກົງກັນວັນທີ່ 15 ເມສາ 2015(ເນົາວັນດຽວ).
ວັນສັງຂາຣຂຶ້ນ : ວັນພະຫັດ(ມື້ເຕົ່າເສັດ) ແຮມ 13 ຄ່ຳ ເດືອນ 5 , ພສ 2557 ກົງກັນວັນທີ່ 16 ເມສາ 2015 ເວລາ 18
ໂມງ 21 ນາທີ 36 ວິນາທີ , ປ່ຽນວັນຖະເຫລີງສົກປີໃຫມ່ລາວ ຈຸລສັກຣາຊ ເປັນ 1377.
ນາງສັງຂາຣ : ປີມະແມ -ຮັບມົດ – ສັຕຕະສົກ ,ທາງຈັນທະຣະຄະຕິເປັນອະທິກະມາສ , ປົກກະຕິສຸຣະທິນ ,ທາງສຸຣິຍະຄະຕິ ກໍ່ເປັນປົກກະຕິສຸຣະທິນເຫມືອນກັນ ນາມມະຫາສົງກຣານຕ໌ ນາງເທພພະທິດາທີ່ 3 ຊົງພະນາມວ່າ “ ຮາກສະເທວີ ” ຊົງພະຫຸຣັດ ທັດດອກບົວຫລວງ ອາພອນປະດັບດ້ວຍແກ້ວໂມລາ(ແກ້ວລາຍ),ສະເຫວີຍໂລຫິດ(ເລືອດ)ເປັນພັກສາຫາຣ,ພະຫັຕຖ໌ຂວາຊົງຕຣີສຸລ(ຫອກສາມຫງ່າມ) , ພະຫັຕຖ໌ຊ້າຍຊົງທະນູ , ສະເດັຈໄສຍາສນ໌ລັບພະເນຕມາເທິງຫລັງວະຣະຫະ(ຫມູ) ເປັນພາຫະນະ .
ເກນພິຣຸນະສາຕ : ພະອາທິດເປັນອະທິບໍດີ, ນາຄຫລິ້ນນ້ຳ 4 ໂຕ, ບັນດານໃຫ້ຝົນຕົກ 400ຫ່າ, ຕົກໃນຂອບຈັກກະວາຣ 160 ຫ່າ, ຕົກໃນປ່າຫິມະພານຕ໌ 120 ຫ່າ, ຕົກໃນມະຫາສະຫມຸດ 80 ຫ່າ, ຕົກໃນມະນຸສໂລກ 40 ຫ່າ. …
ເກນທັນຍາຫາຣ : ຊື່ວ່າປັຈສິມະ , ເຂົ້າກ້າໄຮ່ນາຈະໄດ້ 1 ສ່ວນ , ເສັຽໄປ 5 ສ່ວນ , ໂພຊນິຍາຫາຣມີພໍສົມຄວນ, ປະຊາຊົນຈະສຸຂແດ່…. ທຸກແດ່…. ປະປົນກັນ…ຯ.
ຜລາມັດສະມັງສາຫາຣ : ຜົລໄມ້ ຈະມີພໍສົມຄວນ ຯ.
ຣຸກຂະຊາຕ : ໄມ້ງິ້ວເປັນພຍາ, ບ້ານເມືອງຈະສະຫງົບສຸຂດີ ແຕ່ຟ້າຝົນບໍ່ສູ້ດີ… ໆລໆ.
ເກນກາລະໂຍກ : ວັນພຸດເປັນທຸງໄຊຍ໌, ວັນອັງຄານເປັນອະທິບໍດີ, ວັນອາທິດເປັນອຸບາທວ໌, ວັນພະຫັດເປັນໂລກະວິນາສນ໌…ຯ.

ສະຫລຸບຜົລສຳເຣັຈການຄຳນວນ ມີດັ່ງນີ້ :
1% ຫໍຣະຄຸນອັຕຕາ 502962 ຄໍານວນວັນທີ່ລ່ວງມາແລ້ວ (1377).
2% ກຳມັດຊະພົນອັຕຕາ 188 ປົກກະຕິສຸຣະທິນ.
3% ອຸຈຈະພົນອັຕຕາ 1381 ຈຳນວນ 365 ວັນ ໃນຮອບ 1 ປີ.
4% ອະວະມານອັຕຕາ 0 ປົກກະຕິວາຣ.
5% ອາດສະເກນອັຕຕາ 17031 ອະທິກະມາສ.
6% ດິຖີຖະເຫລີງສົກ 28 ເດືອນ 5 ແຮມ 13 ຄ່ຳ ເປັນວັນສັງຂາຣຂຶ້ນປີໃຫມ່ລາວ.
7% ວະຣະຖະເຫລີງສົກ 5 ວັນພະຫັດ…ຯ

ແຜນການສະເຫລີມສະຫລອງບຸນປີໃຫມ່ລາວທີ່ຫລວງພຣະບາງ ປີ ພສ2557-58, ຈສ 1376-77, ຄສ 2015 ມີດັ່ງນີ້ :
• ວັນສຸກ ,ວັນທີ່ 10 ເມສາ 2015 :
– 8:30 ເປີດງານຕະຫລາດນັດວາງສະແດງສິນຄ້າທີ່ເດີນພຣະທາຕຸຫລວງ.
– 9:00 ຈັດການແຂ່ງຂັນກິລາພຶ້ນເມືອງຂອງຊາວຫລວງພຣະບາງ.
– 19:30 ຊົມການສະແດງສິລະປະວັນນະຄະດີ ຂອງພາຍໃນແລະຕ່າງປະເທດ ຢູ່ທີເດີ່ນພຣະທາຕຸຫລວງ.
• ວັນເສົາ-ອາທິດ 11-12 ເມສາ 2015 :
– ປະກວດນາງສັງຂານທີ່ເດິ່ນພຣະທາຕຸຫລວງ.
• ວັນອາທິດ-ຈັນ ວັນທີ່ 12-13 ເມສາ 2015:
– 7:00 ພິທີແຫ່ຊ້າງຮຽງເກີຍ ຈາກເດີ່ນທາຕຸຫລວງ ມາທີ່ຂ້າງວັດໃຫມ່ແລະຂ້າງປະຕູໂຂງວັດຊຽງທອງ.
• ວັນອັງຄານທີ່ 14 ເມສາ 2015 :
– 6:00 ໂລະລາດ ແຕ່ສີ່ແຍກຕາດຫມໍ້ຮອດສາມແຍກໂຍທາແຂວງ.
– 13:00 ລົງຕົບພຣະທາຕຸຊາຍທີ່ດອນຊາຍມຸງຄຸນ( ປະກອບມີ : ບາສີ ກິລາຕ່າງໆ ຈຸດບັ້ງໄຟຫາງ ແລະສົງນ້ຳຕາມວັດຝັ່ງຊຽງແມນ).
• ວັນພຸດ ວັນທີ່ 15 ເມສາ 2015 :
– 8:00 ທ່ຽວຊົມບ້ານວັດທະນະທັມລື້ຜານົມ ມີການບາສີສູ່ຂວັນໃຫ້ບັນດາແຂກຜູ້ນຳຂັ້ນຕ່າງໆ.
– 13:00 (ແຫ່ຫວໍຂຶ້ນ)ຂະບວນແຫ່ຫວໍອອກຈາກວັດທາດນ້ອຍ ໄປສູ່ວັດຊຽງທອງ ຕາມເສັ້ນທາງສີສະຫວ່າງວົງ.
– 19:00 ສົ່ງນ້ຳພຣະພຸທທະຮູບຕາມວັດຕ່າງໆເພື່ອເປັນສີຣີມຸງຄຸນແດ່ຕົນເອງແລະຄອບຄົວ.
• ວັນພະຫັດ ວັນທີ່ 16 ເມສາ 2015 :
– 5:30 ຜູ້ນຳແລະປະຊາຊົນແລະບັນດາແຂກນັກທ່ອງທ່ຽວເຂົ້າຮ່ວມກັນໃສ່ບາດ ຢູ່ທີພີພິຕະພັນ(ພຣະຣາຊວັງ)ແລະຂຶ້ນບູຊາພຣະທາດພູສີ.
– 13:00 (ແຫ່ຫວໍລ່ອງ)ຂະບວນແຫ່ຫວໍອອກຈາກວັດຊຽງທອງ ໄປຫາວັດທາດນ້ອຍ ຕາມເສັ້ນທາງສີສະຫວ່າງວົງ.
– 19:00 ຊົມຂະບວນແຫ່ພຣະຍານາຄ ,ໂຄມໄຟ ແຕ່ພຣະທາຕຸພູສີລົງມາສູ່ໜອງພຣະຣາຊວັງ(ຫໍພີພີຕະພັນ)ແລະຊົມການສະແດງພະລັກ ພະລາມ ນາງແກ້ວ ລິງ ຍັກ…
• ວັນສຸກ ວັນທີ່ 17 ເມສາ 2015 :
– 7:00 ເຕົ້າໂຮມພຣະພິຂຸສົງ , ຜູ້ນຳ ເຖົ້າແກ່ຜູ້ຊົງຄຸນນະວຸທທິ ມວນຊົນ ແລະແຂກພາຍໃນແລະຕ່າງປະເທດ ຢູ່ທີ່ຫໍພຣະບາງ ເພື່ອອະຣາດທະນາອັງເຊີນພຣະບາງແລະແຫ່ມາທີວັດໃຫມ່ສຸວັນນະພູມມາຣາມ ເພື່ອເຮັດພີທີຫົດສົງ.
– 13:00 ຜູ້ນຳແລະນາງສັງຂານທັງ7 ເພື່ອໄປສົງນ້ຳພຣະພຸທທະຮູບທີ່ຖ້ຳຕິ່ງ ເມືອງປາກອູ ຕາມບູຮານນະການ.
– 15:00 ປີດງານຕະຫລາດນັດ.
– ສ່ວນຕອນຄ່ຳແມ່ນສຶບຕໍ່ຫົດສົງນ້ຳພຣະບາງ ແລະຊົມການສະແດງສິລະປະວັນນະຄະດີ ພະລັກ-ພະລາມທີ່ລານເດີ່ນວັດໃຫມ່.
• ວັນເສົາ-ອາທິດ ວັນທີ່ 18-19 ເມສາ 2015 :
– ສຶບຕໍ່ສົງນ້ຳພຣະບາງແລະຕອນຄ່ຳຊົມການຟ້ອນພະລັກ-ພະລາມ ທີ່ລານເດີ່ນວັດໃຫມ່ ສຸວັນນະພູມາຣາມ.
• ວັນຈັນ ວັນທີ່ 20 ເມສາ 2015 :
– ເຕົ້າໂຮມພຣະພິຂຸສົງ , ຜູ້ນຳ ເຖົ້າແກ່ຜູ້ຊົງຄຸນນະວຸທທິ ມວນຊົນ ແລະແຂກພາຍໃນແລະຕ່າງປະເທດ ຢູ່ທີ່ຫໍພຣະບາງ ເພື່ອອະຣາດທະນາອັງເຊີນພຣະບາງກັບຄືນໄປປະດິດສະຖານທີ່ຫໍພຣະບາງ.