ກອງທັບເຄັນຢາບຸກໂຈມຕີທາງອາກາດ ແກ້ແຄ້ນກຸ່ມອັນ-ຊາບັບ ຈາກເຫດສັງຫານໝູ່ນັກສຶກສາຢູ່ມະຫາວິທະຍາໄລກາຣິດຊາ
ສຳນັກຂ່າວຕ່າງປະເທດ ລາຍງານໃນວັນທີ 6 ເມສາຜ່ານມານີ້ວ່າ ກອງກຳລັງທາງອາກາດຂອງກອງທັບເຄັນຢາ ໄດ້ບຸກໂຈມຕີຄ້າຍ 2 ແຫ່ງ ຂອງກຸ່ມອັນ-ຊາບັບ ໃນປະເທດໂຊມາລີ ມື້ວັນອາທິດ (5 ເມສາ) ຜ່ານມານີ້ ເຊິ່ງເປັນການຕອບໂຕ້ທາງທະຫານຄັ້ງທຳອິດຂອງເຄັນຢາ ຕໍ່ກັບກຸ່ມຫົວຮຸນແຮງ ທີ່ກໍ່ເຫດບຸກຂ້າໝູ່ນັກສຶກສາໃນມະຫາວິທະຍາໄລກາຣິດຊີທີ່ຜ່ານມາ.
ແຫລ່ງຂ່າວລະບຸວ່າ ເຮືອບິນຮົບຂອງເຄັນຢາ ໄດ້ຖະຫລົ່ມຄ້າຍ 2 ແຫ່ງ ໃນກອນໂດໂດເວ ແລະ ອິດສະມາອິນ ເຊິ່ງທັງສອງແຫ່ງແມ່ນຢູ່ໃນເຂດເກໂດ ປະເທດໂຊມາລີ ຕິດກັບຊາຍແດນຂອງປະເທດເຄັນຢາ ແຕ່ເນື່ອງຈາກມີເມກປົກຄຸມຢູ່ ຈິ່ງບໍ່ສາມາດປະເມີນຄວາມເສຍຫາຍ ແລະ ຈຳນວນຜູ້ໄດ້ຮັບບາດເຈັບ ຫລື ເສຍຊີວິດໄດ້.
ທັງນີ້ ປະຕິບັດການດັ່ງກ່າວ ແມ່ນເປັນການແກ້ແຄ້ນກຸ່ມອັນ-ຊາບັບ ທີ່ໄດ້ບຸກເຂົ້າໄປສັງຫານໝູ່ ນັກສຶກສາຈຳນວນ 148 ຄົນ ໃນມື້ວັນພະຫັດທີ 2 ເມສາຜ່ານມາຢູ່ມະຫາວິທະຍາໄລກາຣິດຊາ ຂອງປະເທດເຄັນຢາ ເຊິ່ງຢູ່ຫ່າງຈາກຊາຍແດນໂຊມາລີໄປປະມານ 200 ກິໂລແມັດ.