ນາຍົກລັດຖະມົນຕີຣັດເຊຍ ຢ້ຽມຢາມຫວຽດນາມ ກຽມຄວາມພ້ອມບັນລຸຂໍ້ຕົກລົງການຄ້າເສລີລະຫວ່າງຫວຽດນາມ ແລະ ສະຫະພາບເສດຖະກິດຢູເຣເຊຍ.
ສຳນັກຂ່າວຕ່າງປະເທດ ລາຍງານໃນວັນທີ 6 ເມສານີ້ວ່າ ນາຍົກລັດຖະມົນຕີ ດິມິທຣີ ເມດເວເດບ ຂອງຣັດເຊຍ ໄດ້ເດີນທາງມາຢ້ຽມຢາມສາທາລະນະລັດ ສັງຄົມນິຍົມຫວຽດນາມ ເປັນເວລາ 3 ມື້ ຕັ້ງແຕ່ມື້ວານນີ້ (5 ເມສາ) ເປັນຕົ້ນໄປ ເພື່ອກຽມຄວາມພ້ອມຂໍ້ຕົກລົງເຂດການຄ້າເສລີລະຫວ່າງ ຫວຽດນາມ ແລະ ສະຫະພາບເສດຖະກິດຢູເຣເຊຍ ໂດຍການຢ້ຽມຢາມໃນຄັ້ງນີ້ນັ້ນ ແມ່ນຍັງບໍ່ທັນມີກຳນົດການລົງນາມຢ່າງເປັນທາງການເທື່ອ ເຊິ່ງເປັນການຢ້ຽມຢາມເພື່ອຫາລືໃນລາຍລະອຽດຂອງຂໍ້ຕົກລົງດັ່ງກ່າວ.
ຫວຽດນາມ ແລະ ບັນດາປະເທດໃນກຸ່ມສະຫະພາບເສດຖະກິດຢູເຣເຊຍ ເຊິ່ງປະກອບມີ ຣັດເຊຍ, ເບລາຣຸດ, ກາຊັກສະຖານ ແລະ ອາກເມນີ ແມ່ນກຳລັງຢູ່ໃນຂັ້ນຕອນສຸດທ້າຍຂອງການເຈລະຈາ ໂດຍຄາດວ່າຈະມີການລົງນາມໃນຂໍ້ຕົກລົງຢ່າງເປັນທາງການໄດ້ພາຍໃນປີນີ້.
ທ່ານ ເມດເວເດບ ກ່າວຕໍ່ກັບສື່ມວນຊົນຂອງຫວຽດນາມວ່າ ” ເຂດການຄ້າເສລີລະຫວ່າງຫວຽດນາມ ແລະ ສະຫະພາບເສດຖະກິດຢູເຣເຊຍ ແມ່ນຈະກາຍເປັນຂໍ້ຕົກລົງສະລັບທຳອິດ ລະຫວ່າງສະຫະພາບເສດຖະກິດຢູເຣເຊຍ ທີ່ລົງນາມກັບປະເທດທີ 3 “