ເກົາຫລີໃຕ້ ຕັ້ງຂໍ້ຫາແມ່ຍິງລ່ວງລະເມີດທາງເພດຜູ້ຊາຍ ຄັ້ງທຳອິດໃນປະຫວັດສາດຂອງປະເທດ ຫລັງມີການແກ້ກົດໝາຍໃຫ້ຟ້ອງຜູ້ຂົ່ມຂືນໄດ້ທັງຊາຍ ແລະ ຍິງ.
ສຳນັກຂ່າວຕ່າງປະເທດ ລາຍງານໃນວັນທີ 4 ເມສາຜ່ານມານີ້ວ່າ ສຳນັກງານໄອຍະການສູງສຸດໃນນະຄອນຫລວງເຊອູນ ສາທາລະນະລັດເກົາຫລີ ຫລື ເກົາຫລີໃຕ້ ໄດ້ຕັ້ງຂໍ້ຫາລ່ວງລະເມີດທາງເພດ ແກ່ນາງ ຊອນ ອາຍຸ 45 ປີ ຫລັງຈາກນາງໄດ້ກໍ່ເຫດວາງຢາ ແລະ ພະຍາຍາມຂົ່ມຂືນແຟນເກົ່າ ເຊິ່ງໄດ້ໄປແຕ່ງດອງກັບຜູ້ຍິງຄົນອື່ນໄປແລ້ວ ໂດຍນາງໄດ້ຈັບຊາຍແຟນເກົ່າຂອງນາງມັດໄວ້ ແລະ ທຳຮ້າຍຮ່າງກາຍເຂົາ ໃນເວລາທີ່ເຂົາຟື້ນມີສະຕິຂຶ້ນມາອີກດ້ວຍ.
ທັງນີ້ ກໍລະນີດັ່ງກ່າວ ໄດ້ກາຍເປັນຄັ້ງທຳອິດໃນປະຫວັດສາດຂອງເກົາຫລີໃຕ້ ທີ່ມີການຕັ້ງຂໍ້ຫາລ່ວງລະເມີດທາງເພດແກ່ຜູ້ຍິງ ເຊິ່ງເປັນຜົນມາຈາກການແກ້ໄຂກົດໝາຍອາຍາ ວ່າດ້ວຍການລ່ວງລະເມີດທາງເພດຂຶ້ນມາໃໝ່ ເມື່ອເດືອນມິຖຸນາ ປີ 2013 ທີ່ສົ່ງຜົນເຮັດໃຫ້ສາມາດຕັ້ງຂໍ້ຫານີ້ໄດ້ທັງຜູ້ຊາຍ ແລະ ຜູ້ຍິງ.