ໃນວັນທີ 1 ເມສານີ້, ເຈົ້າໜ້າທີ່ ປກສ ແຂວງຈຳປາສັກ, ສາມາດຈັບຜູ້ຄ້າຢາເສບຕິດລາຍໃຫຍ່ຢູ່ເສັ້ນທາງເຂດທາງເລກ 13 ໃຕ້ ເຂດເມືອງຊະນະສົມບູນ ຜູ້ຕ້ອງຫາຄື ທ້າວ ພອນວິໄລ ອາຍຸ 25 ປີ ຢູ່ບ້ານເລົ່າຫຍ້າ ເມືອງ ປະທຸມພອນ ແຂວງຈຳປາສັກ ພ້ອມຂອງກາງຢາບ້າ ຈຳນວນ 2 ພັນເມັດ.
ເຈົ້າໜ້າທີ່ໃຫ້ຮູ້ວ່າ: ທ້າວ ພອນວິໄລ ຖືກຈັບຕົວໄດ້ໃນຂະນະຂັບຂີ່ລົດຈັກແຕ່ ເມືອງຊະນະສົມບູນເພື່ອເຂົ້າມາ ເມືອງປະທຸມພອນ, ຊຶ່ງເຈົ້າໜ້າທີ່ຕັ້ງດ່ານກວດ ກາເອກກະສານລົດ ແລະ ໄດ້ກວດຄົ້ນລົດຈັກຜູ້ກ່ຽວຈຶ່ງພົບເຫັນຢາເສບຕິດດັ່ງກ່າວ ຊຸກເຊື່ອງຢູ່ກ້ອງເບາະລົດຈຶ່ງ ໄດ້ຍຶດໄວ້ເປັນຫລັກຖານ ໃນການດຳເນີນຄະດີຕາມລະບຽບກົດໝາຍ.
ທ່ານຫົວໜ້າຫ້ອງຕຳຫລວດກອງບັນຊາການ ປກສ ແຂວງຈຳປາສັກ ພັນໂທ ຄອນສະຫວັນ ໄຊຊະນະ ໃຫ້ຮູ້ວ່າ: ພາຍຫລັງ, ໄດ້ຕັ້ງດ່ານກວດກາລົດເຂົ້າ-ອອກ ເມືອງໃນເສັ້ນທາງເລກ 13 ໃຕ້ເຂດເມືອງຊະນະສົມບູນເພື່ອກວດກາພາ ຫະນະທີ່ເຂົ້າ-ອອກ ແລະ ແນ່ໃສ່ສະກັດກັ້ນ ແລະ ຕ້ານປະກົດການຫຍໍ້ທໍ້ຕ່າງໆ ເປັນຕົ້ນ: ການຂົນສົ່ງຢາເສບຕິດ, ລັກລອບຂົນສົ່ງໄມ້ຜິດກົດໝາຍ, ການຄ້າຂາຍເຖື່ອນຕ່າງໆເພື່ອຈັບຜູ້ກະທຳຜິດມາດຳເນີນຄະດີຄື: ໃນວັນທີ 6 ກຸມພາ 2015, ສາມາດຈັບຂະບວນການຄ້າຢາເສບຕິດຈຳນວນໜຶ່ງພ້ອມຂອງການຢາບ້າ 36 ພັນເມັດ, ວັນທີ 29 ມີນາ 2015 ຈັບຜູ້ລັກລອບຂົນໄມ້ເຖື່ອນໄດ້ຜູ້ຕ້ອງຫາສອງຄົນ ແລະ ຍືດລົດກະບະວີໂກ້ທີ່ນຳໃຊ້ເປັນພາຫະນະຂົນສົ່ງໄມ້ຜິດກົດໝາຍດັ່ງກ່າວໄວ້ໄດ້ ເພື່ອດຳເນີນຄະດີຕາມລະບຽບກົດໝາຍ.
ແຫລ່ງຂ່າວ: ລາວພັດທະນາ