ລົດ​ໄຟ​ຄວາມ​ໄວ​ສູງ ຢູ່​ເມືອງ​ເຊິນ​ເຈິ້ນ ແຂວງ​ກວາງ​ຕຸ້ງ

ຈີນ​ກຽມ​ເປີດ​ເສັ້ນ​ທາງ​ລົດ​ໄຟ​ຄວາມ​ໄວ​ສູງ ກວາງ​ໂຈວ – ຮົ່ງ​ກົງ ໃຊ້​ເວ​ລາ​ພຽງ 45 ນາ​ທີ ເລີ່ມ​ເປີດ​ໃຫ້​ບໍ​ລິ​ການ​ປີ 2017 ຈະ​ມາ​ເຖິງ​ນີ້.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 31 ມີ​ນາ​ຜ່ານ​ມາ​ນີ້​ວ່າ ທ່ານ ຫວັງ ເມິ່ງ​ຊູ່ ຮອງ​ຫົວ​ໜ້າ​ວິ​ສະ​ວະ​ກອນ ບໍ​ລິ​ສັດ China Railway Tunnel Group ວ່າ ໂຄງ​ການ​ກໍ່​ສ້າງ​ເສັ້ນ​ທາງ​ລົດ​ໄຟ​ຄວາມ​ໄວ​ສູງ​ລະ​ຫວ່າງ​ເຊິນ​ເຈິ້ນ – ຮົ່ງ​ກົງ ກຳ​ລັງ​ຄືບ​ໜ້າ​ຕາມ​ແຜນ​ການ ໂດຍ​ສ່ວນ​ເສັ້ນ​ທາງ​ລະ​ຫວ່າງກວາງ​ໂຈວ – ເຊິນ​ເຈິ້ນ​ນັ້ນ ແມ່ນ​ໄດ້​ສຳ​ເລັດ​ລຸ​ລ່ວງ​ແລ້ວ. ທ່ານ​ຍັງ​ໄດ້​ກ​່າວ​ອີກວ່າ ຈາກ​ສະ​ພາບ​ພື້ນ​ທີ່​ໃນ​ທ້ອງ​ຖິ່ນ ເຮັດ​ໃຫ້​ຊ່ວງ​ຂອງ​ທາງ​ລົດ​ໄຟ​ດັ່ງ​ກ່າວ​ນີ້ ຕ້ອງ​ໄດ້​ຫລຸດ​ຄວາມ​ໄວ​ລົງ​ເຫລືອ 200 ກິ​ໂລ​ແມັດ​ຕໍ່​ຊົ່ວ​ໂມງ ແທນ​ທີ່​ຈະ​ເປັນ 350 ກິ​ໂລ​ແມັດ​ຕໍ່​ຊົ່ວ​ໂມງ​ຕາມ​ແຜນ​ການ ເຊິ່ງ​ໃຊ້​ເວ​ລາ​ພຽງ​ແຕ່ 45 ນາ​ທີ່​ເທົ່າ​ນັ້ນ​ໃນ​ການ​ເດີນ​ທາງ ໂດຍ​ຈະ​ເລີ່ມ​ເປີດ​ໃຫ້​ບໍ​ລິ​ການ​ພາຍ​ໃນ​ປີ 2017 ນີ້ ແລະ ເສັ້​ນ​ທາງ​ລົດ​ໄຟ​ດັ່ງ​ກ່າວ ຈະ​ເປັນ​ການ​ເຊື່ອມ​ໂຍງ​ທາງ​ດ້ານ​ເສດ​ຖະ​ກິດ​ອັນ​ສຳ​ຄັນ ລະ​ຫວ່າງ​ເກາະ​ຮົ່ງ​ກົງ ແລະ ຈີນ​ແຜ່​ນ​ດິນ​ໃຫຍ່.