ເພື່ອ​ປະຕິບັດ​ຕາມ​ລັດ​ຖະ​ດຳລັດ​ຂອງ​ປະທານ​ປະເທດ ແຫ່ງ ​ສປປ ລາວ ວ່າ​ດ້ວຍ​ການ​ປະດັບຫຼຽນ​ໃຫ້​ແກ່​ສູນ​ກາງ​ສະຫະພັນແມ່ຍິງ​ຫວຽດນາມ ເນື່ອງ​ໃນ​ໂອກາດ​ສະເຫຼີມສະຫຼອງ 50 ປີ ວັນສ້າງຕັ້ງ​ສາຍ​ພົວພັນ​ການ​ທູດ ແລະ 35 ປີ ແຫ່ງ​ການ​ເຊັນ​ສັນຍາ​ມິດຕະພາບ ການ​ຮ່ວມ​ມື​ຮອບດ້ານ ລະຫວ່າງ ລາວ-ຫວຽດນາມ.

ໂດຍ​ໄດ້​ຮັບ​ການ​ມອບ​ໝາຍຈາກ​ລັດຖະບານ ແຫ່ງ ​ສປປ ລາວ ໃນ​ວັນ​ທີ 25 ມີນາ 2015 ນີ້ ທີ່​ນະຄອນຫຼວງ​ຮ່າ​ໂນ້ຍ ​ສສ ຫວຽດນາມ ທ່ານ​ນາງ ສີໃສ ລືເດດ​ມູນ​ສອນ ກຳມະການ​ສູນກາງ​ພັກ ປະທານ​ຄະນະ​ບໍລິຫານງານ​ສູນ​ກາງ​ສະຫະພັນ​ແມ່ຍິງລາວ ໄດ້​ປະດັບ​ຫຼຽນ​ໄຊ​ອິດ​ສະຫຼະ​ຊັ້ນ I ໃຫ້​ແກ່​ສູນ​ກາງ​ສະຫະພັນ​ແມ່ຍິງ​ແຫ່ງ ​ສສ ຫວຽດນາມ ຫຼຽນ​ໄຊ​ອິດສະຫຼະ​ຊັ້ນ II ໃຫ້​ແກ່ສະຫາຍ​ນາງ ຫງວຽນ ທິ ແທງ ຮົວ ກຳມະການ​ສູນ​ກາງ​ພັກຄອມ​ມູ​ນິດ​ຫວຽດນາມ ປະທານສູນ​ກາງ​ສະຫະພັນ​ແມ່ຍິງ​ຫວຽດນາມ ຫຼຽນ​ໄຊ​ອິດສະຫຼະ​ຊັ້ນ III ໃຫ້​ແກ່ 2 ສະຫາຍຄື: ສະຫາຍນາງ ຫງວຽນ ທິ ກິມ ທຸຍ ແລະ ສະຫາຍ​ນາງ ຫງວຽນ ທິ ທູ ຮາ ຮອງ​ປະທານ​ສູນ​ກາງ​ສະຫະພັນແມ່ຍິງ​ຫວຽດນາມ ແລະ ປະດັບຫຼຽນ​ໄຊ​ມິດຕະພາບ​ໃຫ້​ແກ່ 2 ສະຫາຍ ຄື: ສະຫາຍ​ນາງ ຟາມ ຮວາຍ ຢາງ ອະດີດ​ຫົວໜ້າ​ພະແນກ​ພົວພັນ​ຕ່າງປະເທດ ແລະ ສະຫາຍ​ນາງ ເຈີນ ທິ ຮວາ ອະດີດ​ຮອງ​ຫົວໜ້າ​ພະ​ແນກພົວພັນຕ່າງປະເທດ​ຂອງ​ສະຫະພັນ​ແມ່ຍິງ​ຫວຽດນາມ ທີ່​ມີ​ຜົນງານ​ຄຸນງາມ​ຄວາມ​ດີ​ປະກອບສ່ວນ​ຊ່ວຍເຫຼືອ ​ສປປ ລາວ ໃນ​ຂົງເຂດ​ວຽກງານ​ແມ່ຍິງ ເວົ້າ​ລວມ ໂດຍ​ສະເພາະ ສູນ​ກາງ​ສະຫະພັນ​ແມ່ຍິງລາວ ອັນ​ເປັນ​ການ​ເສີມ​ສ້າງສາຍ​ພົວພັນ​ມິດຕະພາບ​ຄວາມສາມັກຄີ​ແບບ​ພິເສດ ລະຫວ່າງສອງ​ພັກ-ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດນາມ ໃຫ້​ແໜ້ນ​ແຟ້ນ​ຍິ່ງໆ​ຂຶ້ນ.

ໃນ​ໂອກາດ​ທີ່​ມີ​ຄວາມ​ໝາຍສຳຄັນ​ນີ້ ທ່ານ​ນາງ ຫງວຽນ ທິ ຢວນ ກຳມະການ​ສູນ​ກາງ​ພັກ ຮອງ​ປະທານ​ປະເທດແຫ່ງ ​ສສ ຫວຽດນາມ ກໍ່​ໄດ້​ຕາງໜ້າ​ປະທານ​ປະເທດ​ແຫ່ງ ​ສສ ຫວຽດນາມ ປະດັບ​ຫຼຽນ​ໄຊ​ເອກະລາດຊັ້ນ I ໃຫ້​ສະຫະພັນ​ແມ່ຍິງ​ລາວ ຫຼຽນ​ໄຊ​ເອກະລາດ​ຊັ້ນ II ໃຫ້​ແກ່ທ່ານ​ນາງ ສີໃສ ລື​ເດດ​ມູນ​ສອນ ກຳມະການ​ສູນ​ກາງ​ພັກ ປະທານຄະນະ​ບໍລິຫານ​ງານ​ສູນ​ກາງ ສະຫະ​ພັນ​ແມ່ຍິງ​ລາວ ຫຼຽນ​ໄຊ​ເອກະ​ລາດ​ຊັ້ນ III ໃຫ້​ແກ່​ທ່ານ​ນາງ ບັນດິດ ປະທຸມ​ວັນ ຮອງ​ປະທານ ​ສສຍລ ແລະ ປະດັບ​ຫຼຽນ​ໄຊ​ມິດຕະ​ພາບໃຫ້​ແກ່​ທ່ານ​ນາງ ບົວຈັນ ສີ​ຫາ​ນາດ ຄະນະ​ບໍລິຫານງານ ຫົວໜ້າ​ຫ້ອງການ​ສູນ​ກາງສະຫະພັນ​ແມ່ຍິງ​ລາວ ທີ່​ມີ​ຜົນງານ​ດີເດັ່ນ​ໃນ​ການ​ເສີມ​ສ້າງ ເພີ່ມ​ທະວີ​ສາຍ​ພົວພັນ​ພິເສດ​ທີ່ເປັນ​ມູນເຊື້ອ ແລະ ການ​ຮ່ວມ​ມືຮອບດ້ານ ລະຫວ່າງ​ສອງ​ພັກ-ສອງ​ລັດ ກໍ່​ຄື​ປະຊາຊົນ​ສອງ​ຊາດ ລາວ-ຫວຽດນາມ.

ໃນ​ໂອກາດ​ການເຄື່ອນໄຫວຢ້ຽມຢາມ​ມອບ​ຫຼຽນ​ຢ່າງ​ເປັນທາງ​ການ​ໃນ​ຄັ້ງ​ນີ້ ທ່ານ​ນາງ ສີໃສ ລື​ເດດ​ມູນ​ສອນ ພ້ອມ​ຄະນະ ​ຍັງ​ໄດ້​ພົບ​ປະ​ແລກປ່ຽນ​ບົດຮຽນ​ດ້ານ​ຕ່າງໆ ກັບ​ຄະນະ​ນຳສະຫະພັນ​ແມ່ຍິງ ​ສສ ຫວຽດນາມ ຢ້ຽມ​ຄຳນັບ​ສຸສານ​ປະທານ ໂຮ່​ຈິ​ມິງ ຢ້ຽມ​ຄຳນັບ​ທ່ານ​ນາງ ຮ່າ ທິ ກຽດ ຄະນະ​ເລຂາທິການສູນ​ກາງ​ພັກ ຫົວໜ້າ​ຄະນະ​ຂົນຂວາຍສູນ​ກາງ​ພັກຄອມ​ມູ​ນິດຫວຽດນາມ ເຄື່ອນ​ໄຫວ​ຢ້ຽມຢາມພື້ນຖານ​ການ​ຜະລິດ ແລະ ການສ້າງ​ຂະ​ບວນ​ການ​ຂອງ​ສະຫະພັນ​ແມ່ຍິງ ແຂວງ​ຮ່າ​ນາມ ແລະ ແຂວງ​ກວ້າງ​ນິງ ​ສສ ຫວຽດນາມ.

ແຫລ່ງ​ຂ່າວ: ວຽງ​ຈັນ​ໃໝ່