ສະເທືອນໃຈ ສາວນ້ອຍຊາວຫວຽດນາມ ນັ່ງຮ້ອງໄຫ້ອາໄລຮັກ ຫລັງພົບໝາແສນຮັກຂອງຕົນ ຖືກຂຶ້ນເຕົາປີ້ງຂາຍແຄມທາງ.
ສຳນັກຂາວຕ່າງປະເທດ ໄດ້ເຜີຍແຜ່ພາບສະເທືອນໃຈດັ່ງກ່າວນີ້ ໃນວັນທີ 31 ມີນາທີ່ຜ່ານມາ ພ້ອມກັບລະບຸວ່າ ເຫດການດັ່ງກ່າວເກີດຂຶ້ນ ເມື່ອເດັກນ້ອຍຍິງ ອາຍຸ 5 ປີຄົນໜຶ່ງ ຢູ່ທາງພາກເໜືອຂອງປະເທດຫວຽດນາມ ຕ້ອງນັ່ງຮ້ອງໄຫ້ຢູ່ຂ້າງໝາແສນຮັກຂອງນາງ ທີ່ເສຍອອກຈາກເຮືອນໄປ ແລ້ວມາພົບອີກເທື່ອໜຶ່ງ ກໍປະກົດວ່າໄດ້ກາຍເປັນອາຫານຊັ້ນເລີດ ຂຶ້ນເຕົາປີ້ງຂາຍຢູ່ແຄມທາງໃນຕະຫລາດເປັນທີ່ຮຽບຮ້ອຍແລ້ວ.
ແຫລ່ງຂ່າວລາຍງານວ່າ ສາວນ້ອຍຄົນດັ່ງກ່າວນີ້ ໄດ້ລ້ຽງໝາຂອງນາງຊື່ ຟລາວເວີ້ ມາດົນເຖິງ 3 ປີ ກ່ອນທີ່ມັນຈະເສຍ ຈົນຮອດມື້ໜຶ່ງ ເມື່ອສາວນ້ອຍຍ່າງຜ່ານຕະຫລາດ ກໍພົບເຫັນໝາຂອງນາງວາງເທິງກະຕ່າພ້ອມຂາຍ ແລ້ວນາງກໍຮ້ອງໄຫ້ພ້ອມສຽງລັ່ນອອກມາວ່າ ” ອັນນີ້ມັນໝາຂອງຂ້ອຍ! ”
ທັງນີ້ ຮູບພາບດັ່ງກ່າວໄດ້ຖືກແຊຣ໌ສະໜັ່ນທົ່ວສັງຄົມອອນລາຍຂອງຫວຽດນາມ ເຊິ່ງກໍ່ໃຫ້ເກີດການຖົກຖຽງກັນຄັ້ງຍິ່ງໃຫຍ່ໃນສັງຄົມຫວຽດນາມ ກ່ຽວກັບຈາລິຍະທຳໃນສັງຄົມ ວ່າການກິນຊີ້ນໝາເປັນສິ່ງທີ່ສົມຄວນ ຫລື ບໍ່.
ຢ່າງໃດກໍຕາມ ການກິນຊີ້ນໝາຖືເປັນສິ່ງທີ່ຖືກກົດໝາຍໃນຫວຽດນາມ ເຊັ່ນດຽວກັນກັບຢູ່ເກົາຫລີ ໂດຍປັດຈຸບັນມີໝາຫລາຍກ່ວາ 3 ແສນໂຕ ຖືກລັກລອບນຳເຂົ້າຈາກປະເທດໄທ ເນື່ອງຈາກມີປະລິມານຕ້ອງການບໍລິໂພກສູງ.