ໃນ​ວັນ​ທີ 26 ມີນາຜ່ານ​ມາ ນີ້, ສານປະຊາຊົນຂັ້ນຕົ້ນນະຄອນຫຼວງວຽງຈັນ, ໄດ້ຄົ້ນຄ້ວາບັນດາຂໍ້ມູນຫຼັກຖານ, ເອກະສານຕ່າງໆ ແລະ ຄຳໃຫ້ການຂອງຈຳເລີຍ ທ້າວ ເພັດສະໝອນ ອາຍຸ 32 ປີ ຢູ່ບ້ານ ປາກທ້າງ ເມືອງ ສີໂຄດຕະບອງ ນະຄອນຫຼວງວຽງຈັນ ຕັດສິນລົງໂທດ ຈຳຄຸກ 5 ປີ ພ້ອມປັບໃໝ ເງິນ 10 ລ້ານກີບ ຕາມມາດຕາ 146 ຂໍ້ 2 ວັກ 1 ຂອງກົດໝາຍອາຍາ. ພາຍຫຼັງຖືກ​ຈັບ​ຕົວ​ໃນ​ຕົ້ນ​ເດືອນກຸມພາ 2014 ຜ່ານ​ມາ ​ໃນ​ຂໍ້​ຫາ​ເສບ ​ແລະ ຄ້າຂາຍ​ຢາ​ເສບ​ຕິດ​ປະ​ເພດ​ຢາ​ບ້າ.

ທ້າວ ເພັດສະໝອນ ຮັບສາລະພາບວ່າ: ຕົນ​ເອງເລີ່ມເສບຢາບ້າມາໄດ້ 3 ປີ ແລ້ວ ແລະ ຕົກມາປີ 2014 ໄດ້ເລີ່ມຂາຍຢາບ້ານຳ​ໂດຍຊື້ ມາ​ຈາກ ທ້າວ ລູ ຄັ້ງລະ 5-10 ເມັດ ໃນລາຄາເມັດລະ 18 ພັນກີບ​ເພື່ອນຳໄປຂາຍຕໍ່ໃຫ້ໄວໜຸ່ມໃນລາຄາເມັດລະ 25 ພັນກີບ. ນອກຈາກນີ້ ຜ່ານມາຜູ້ກ່ຽວເຄີຍຖືກ ປກສ ກຸ່ມບ້ານ ນຳຕົວມາສຶກສາອົບ ຮົມຂັ້ນບ້ານຫຼາຍຄັ້ງແຕ່ຜູ້ກ່ຽວກໍບໍ່ຢຸດເຊົາເສບ ແລະ ຂາຍໃນທີ່ສຸດກໍຖືກຈັບຕົວມາດຳ ເນີນຄະດີຕາມ​ກົດໝາຍ.

ແຫລ່ງ​ຂ່າວ: ລາວ​ພັດ​ທະ​ນາ