ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ທ່ານ ກວນຫົວປິນ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ບັນດານັກທຸລະກິດ ພ້ອມດ້ວຍແຂກຖືກເຊີນ ແລະ ຊາວນະຄອນຫຼວງວຽງຈັນ ໄດ້ເຂົ້າຮ່ວມພິທີເປີດສູນການຄ້າວຽງຈັນເຊັນເຕີ ຢ່າງເປັນທາງການ ວັນທີ 28 ມີນາ 2015.
ທ່ານນາງ ອໍລະໄທ ສັນຕິຄົງຄາ ຜູ້ອຳນວຍການບໍລິສັດ ກຣິດຕິພົງກຣຸບ ຈຳກັດ ກ່າວວ່າ: ສູນການຄ້າວຽງຈັນເຊັນເຕີ ແມ່ນສູນການຄ້າຄົບວົງຈອນອັນດັບໜຶ່ງ ແລະ ເປັນແຫ່ງທີໜຶ່ງຂອງລາວ ຈະມອບປະສົບການຈັບຈ່າຍໃຊ້ສອຍສິນຄ້າທີ່ດີທີ່ສຸດໃຫ້ແກ່ປະຊາຊົນ ລາວ ໃຫ້ການສະໜັບສະໜູນທາງດ້ານປັດໄຈ ວັດຖຸ ແລະ ຈິດໃຈໃນການຕ້ອນຮັບແຂກບ້ານແຂກເມືອງຂອງລາວ ສູນການຄ້າວຽງຈັນເຊັນເຕີ ໄດ້ສຳເລັດໃນການນຳເຂົ້າສິນຄ້າຍີ່ຫໍ້ດັງຂອງໂລກ ສ້າງພື້ນຖານໃຫ້ແກ່ສູນການຄ້າ ໃນການເປັນເປົ້າໝາຍລວມຂອງສິນຄ້າທີ່ບໍ່ມີຢູ່ບ່ອນອື່ນໃນ ນະຄອນຫຼວງວຽງຈັນ ເຊິ່ງປັດຈຸດບັນສິນຄ້າທີ່ໄດ້ເຊັນສັນຍາ ຈະເຂົ້າມາຕັ້ງຢູ່ໃນສູນການຄ້າແຫ່ງນີ້ ມີທະນາຄານແຫ່ງ ສປ ຈີນ ສາຂານະຄອນຫຼວງວຽງຈັນ ໂຮງຮູບເງົາອິນໂດເນເຊຍ ແພັດຕິນຳ ລອງຈິນ ກຸດຊີ ທິດຊອດ ມິໂດ ຣາໂດ ໂອເມກາ ແລະ ໂມງຍີ່ຫໍ້ດັງອື່ນໆ ນອກຈາກນີ້ຍັງມີເຄື່ອງສຳອາງ ເຄື່ອງນຸ່ງຫົ່ມ ເກີບ ກະເປົາຍີ່ຫໍ້ດັງລະດັບໂລກ ຫຼາຍປະເທດທີ່ເຂົ້າມາເປີດຮ້ານຄ້າຢູ່ສູນການຄ້າແຫ່ງນີ້ ປະກອບມີປະເທດສິງກະໂປ ສ ເກົາຫຼີ ຮົງກົງ ຈີນ ໄທ ລາວ ອິນໂດເນເຊຍ ແລະ ຫວຽດນາມ.
ສູນການຄ້າວຽງຈັນເຊັນເຕີ ໄລຍະທຳອິດຈະສະໜອງການຈ້າງງານໂດຍກົງໃຫ້ແກ່ ສປປ ລາວ ຈຳນວນ 300 ກວ່າຕຳແໜ່ງ ນຳພາການພັດທະນາ ແລະ ປັບປຸງຂອງຂະແໜງການທີ່ກ່ຽວຂ້ອງ ຊ່ວຍໃນການປະຕິບັດຍຸດທະສາດ “ໜຶ່ງເສັ້ນທາງ ໜຶ່ງການພັດທະນາ” ກະຕຸ້ນການພັດທະນາດ້ານເສດຖະກິດຂອງເຂດລຸ່ມແມ່ນ້ຳຂອງ ໂດຍສະເພາະແມ່ນການໄປມາຫາສູ່ກັນລະຫວ່າງປະຊາຊົນສອງຊາດ ລາວ-ຈີນ ທີ່ມີຄວາມຈິງໃຈຮ່ວມມືກັນ ເຮັດໃຫ້ເກີດດອກອອກຜົນ.
ສຳລັບສູນການຄ້າວຽງຈັນເຊັນເຕີ ແມ່ນໂຄງການທີ່ບໍລິສັດລົງທຶນຕ່າງປະເທດແຂວງຢຸນນານ ຈຳກັດ ແລະ ບໍລິສັດ ກຣິດຕິພົງກຣຸບ ຈຳກັດ ພັດທະນາຮ່ວມກັນ ເນື້ອທີ່ການກໍ່ສ້າງໄລຍະທຳອິດກວມເອົາເນື້ອທີ່ 70 ພັນຕາລາງແມັດ ເຊິ່ງປະກອບມີຫ້າງຊັບພະສິນຄ້າ ແລະ ຫ້ອງການ ໄລຍະສອງແມ່ນວາງແຜນກໍ່ສ້າງອາພັດເມັນລະດັບບູຕິກ ແລະ ໄລຍະສາມມີແຜນກໍ່ສ້າງທຸລະກິດ ໂຮງແຮມ ສູນການຄ້າວຽງຈັນເຊັນເຕີ ຕັ້ງຢູ່ເຂດສູນການຄ້າທີ່ສຳຄັນຂອງນະຄອນຫຼວງວຽງຈັນ ໂຄງການດັ່ງກ່າວ ໄດ້ເລີ່ມລົງມືກໍ່ສ້າງເດືອນມີນາ 2012 ໃຊ້ເວລາ 3 ປີສຳເລັດໄລຍະທີ 1 ແລະ ໄດ້ເປີດບໍລິການຢ່າງເປັນທາງການ ເພື່ອໃຫ້ປະຊາຊົນລາວ ແລະ ຕ່າງປະເທດທີ່ດຳລົງຊີວິດຢູ່ ສປປ ລາວ ໄດ້ມີສະຖານທີ່ຈັບຈ່າຍຊື້ສິນຄ້າທີ່ມີຍີ່ຫໍ້ດັງຈາກຕ່າງປະເທດ ແລະ ມີສະຖານທີ່ພັກຜ່ອນຢ່ອນໃຈຂອງຄອບຄົວ.
ແຫລ່ງຂ່າວ: ວຽງຈັນໃໝ່