ທ່ານ ຄຳ​ດີ ແກ້ວ​ດວງ​ຈິດ ນາຍບ້ານ​ບ້ານ​ແສນ​ດິນ ເມືອງນາ​ຊາຍ​ທອງ ນະຄອນຫຼວງ​ວຽງຈັນ ໄດ້​ກ່າວ​ວ່າ: ບ້ານ​ແສນ​ດິນ ປະກອບ​ມີ 253 ຄອບຄົວ ໃນ​ນັ້ນ 95% ແມ່ນ​ປະກອບ​ອາຊີບ​ກະສິ​ກຳ ແລະ ປູກຝັງ ສຳລັບ​ພືດ​ທີ່ປູກ​ຕົ້ນຕໍ​ແມ່ນສາລີ ເນື້ອທີ່​ປູກສາລີ​ທັງ​ໝົດ ກວມ 760 ກວ່າເຮັກຕາ ສຳລັບ​ປີ​ນີ້​ເກີດ​ໄພ​ແຫ້ງແລງ ຈຶ່ງ​ເປັນ​ສາເຫດ​ໃຫ້​ເນື້ອທີ່ປູກ​ຫຼຸດ​ລົງ​ເຫຼືອ​ພຽງ 100 ກວ່າເຮັກຕາ ແລະ ຖ້າ​ເປັນ​ລະດູຝົນ ກໍ່​ຈະ​ປູກ​ໃນ​ເນື້ອທີ່​ເທົ່າ​ເດີມ ນອກຈາກ​ປູກ​ສາລີ ກໍ່​ໄດ້​ປູກ​ມັນ​ເພົາ ມັນ​ດ້າງ ໝາກອຶ ຮອງ​ລົງ​ມາ​ກໍ່ໄດ້​ປູກ​ເຂົ້າ​ໃນ​ເນື້ອທີ່ 200 ກວ່າເຮັກຕາ ແລະ ຄາດ​ວ່າ​ປີ​ນີ້ ​ຈະ​ໄດ້ຮັບ​ຜົນ​ຜະລິດ​ສະເລ່ຍ 600 ກິ​ໂລຕໍ່​ຄົນ​ຕໍ່​ປີ.

ສຳລັບ​ຄວາມ​ສາມາດ​ໃນການ​ສະໜອງ​ພືດ​ສູ່​ຕະຫຼາດ ມື້ໜຶ່ງ​ໄດ້​ປະມານ 2 ໂຕນ​ກວ່າ ອອກ​ຈຳໜ່າຍ​ໃນ​ຕະຫຼາດ ນວ ສະເລ່ຍ​ລາຍ​ຮັບ​ຕໍ່​ຫົວ​ຄົນ​ແມ່ນ 1.100 ກວ່າ​ໂດ​ລາ​ຕໍ່​ປີ ໂດຍ​ອຳນາດ​ການ​ປົກຄອງ​ໄດ້​ຊຸກຍູ້​ສົ່ງເສີມ ກຸ່ມ​ຄອບຄົວ​ຕົວ​ແບບ​ດ້ານກະສິກຳ ກໍ່​ຄືຊາວ​ກະສິກອນ ໃຫ້​ຫັນ​ມາ​ນຳ​ໃຊ້​ເຕັກນິກ​ທັນ​ສະໄໝ ເຂົ້າ​ໃນ​ການ​ຜະລິດ​ກະສິກຳ ເຊັ່ນ: ໃນ​ລະດູແລ້ງ ແມ່ນ​ໄດ້​ນຳໃຊ້​ຝົນ​ທຽມ​ຂອງ​ລັດຖະບານ ພາຍຫຼັງ​ໄດ້​ນຳ​ໃຊ້​ຝົນ​ທຽມ​ເຂົ້າໃນ​ການ​ປູກ​ສາລີ ເຫັນ​ວ່າຜົນ​ໄດ້ຮັບ​ສູງ​ຂຶ້ນ ສະເລ່ຍ​ເຮັກຕາ​ໜຶ່ງໄດ້​ຮັບ​ຜົນ​ຜະລິດ​ເຖິງ 7 ໂຕນ​ກວ່າ ເມື່ອ​ທຽບໃສ່​ເມື່ອ​ກ່ອນ ​ທີ່​ບໍ່​ໄດ້​ນຳໃຊ້​ຝົນ​ທຽມ​ໄດ້​ຮັບ​ຜົນ​ຜະລິດ​ພຽງ 2 ໂຕນ​ກວ່າ ເຄື່ອງ​ຜະລິດ​ຝົນທຽມ​ປະກອບ​ມີ 6 ເຄື່ອງ ກວມເນື້ອທີ່ 270 ເຮັກຕາ.

ແຫລ່ງຂ່າວ: ວຽງຈັນໃໝ່