ກອງປະຊຸມນະໂຍບາຍວ່າດ້ວຍຄື້ນຄວາມຖີ່ອາຊຽນ ຄັ້ງທີ 5 ຈັດຂຶ້ນລະຫວ່າງວັນທີ 18-19 ມີນາ 2015 ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍມີທ່ານ ທັນສະໃໝ ກົມມະສິດ ລັດຖະມົນຕີຊ່ວຍວ່າການກະຊວງໄປສະນີ ໂທລະຄົມມະນາຄົມ ແລະ ການສື່ສານ ມີຜູ້ແທນຈາກ 10 ປະເທດສະມາຊິກອາຊຽນ ຜູ້ຊ່ຽວຊານຈາກສະຫະພາບເອີຣົບ ພ້ອມດ້ວຍພະນັກງານວິຊາການຈາກກະຊວງ ແລະ ຜູ້ໃຫ້ບໍລິການດ້ານໂທລະຄົມມະນາຄົມເຂົ້າຮ່ວມ.
ກອງປະຊຸມຄັ້ງນີ້ ມີຈຸດປະສົງເພື່ອຄົ້ນຄວ້າປຶກສາຫາລື ແລະ ແລກປ່ຽນບົດຮຽນກ່ຽວກັບການນຳໃຊ້ຄື້ນຄວາມຖີ່ຍ່ານ 800MHz 900 MHz ແລະ 1800 MHz ເຊິ່ງໃນປັດຈຸບັນໃຫ້ການບໍລິການໂທລະສັບມືຖື ລະບົບ GSM 2G ເພື່ອຫັນເອົາການຈັດສັນຄືນສຳລັບເຕັກໂນໂລຊີໃໝ່ ໃນການໃຫ້ບໍລິການສື່ສານຄວາມໄວສູງ ລະບົບ 3G ແລະ 4G (LTE).
ທ່ານລັດຖະມົນຕີຊ່ວຍວ່າການກະຊວງໄປສະນີ ໂທລະຄົມມະນາຄົມ ແລະ ການສື່ສານ ກ່າວວ່າ: ກອງປະຊຸມນີ້ ແມ່ນມີຄວາມສຳຄັນຫຼາຍ ຕໍ່ວຽກງານໂທລະຄົມມະນາຄົມ ໂດຍສະເພາະ ການຈັດສັນ ແລະ ນຳໃຊ້ຄື້ນຄວາມຖີ່ສຳລັບໂທລະສັບມືຖືຄວາມໄວສູງ ຍ້ອນວ່າມັນຈະນຳເອົາຜົນປະໂຫຍດທາງດ້ານເສດຖະກິດ ມາສູ່ຜູ້ໃຫ້ບໍລິການໂທລະຄົມມະນາຄົມ ໂດຍສະເພາະ ຜູ້ບໍລິໂພກຈະໄດ້ຮັບຜົນປະໂຫຍດຈາກການເຂົ້າເຖິງ ແລະ ການບໍລິການຂໍ້ມູນຂ່າວສານທາງໂທລະສັບມືຖືໄດ້ຢ່າງສະດວກ ແລະ ວ່ອງໄວກວ່າເກົ່າ ຄຽງຄູ່ກັບຂໍ້ສະດວກກໍ່ຍັງມີສິ່ງທ້າທາຍທົດສອບຈຳນວນໜຶ່ງ ທີ່ຈະຕ້ອງໄດ້ພິຈາລະນາຕື່ມ ເຊັ່ນ: ການລົບກວນກັນຂອງຄື້ນຄວາມຖີ່ ສິ່ງທ້າທາຍທາງດ້ານເສດຖະກິດ ແລະ ຜົນກະທົບທີ່ອາດຈະເກີດຂຶ້ນຂອງການແຂ່ງຂັນສູງໃນຕະຫຼາດມືຖື.
ແຫລ່ງຂ່າວ: ວຽງຈັນໃໝ່