ຂ່າວຈາກປະເທດສິງກະໂປ ຖະແຫຼງການສະບັບຫຼ້າສຸດຈາກສຳນັກ ນາຍົກລັດຖະມົນຕີສິງກະໂປກ່າວວ່າ ທ່ານ ລີ ກວນ ຢູ ອະດີດນາຍົກລັດຖະມົນຕີຄົນທຳອິດ ຂອງສິງກະໂປອາຍຸ 91 ປີ ໄດ້ເຖິງແກ່ກຳແລ້ວ ທີ່ໂຮງໝໍສິງກະໂປເຈເນີຣັລ ເມື່ອເວລາ 3:18 ນາທີ.
ທັນທີ ທີ່ຂ່າວການເຖິງແກ່ກຳຂອງ ທ່ານ ລີ ກວນ ຢູ ຖືກປະກາດອອກໄປຢ່າງເປັນທາງການ ປະຊາຊົນສິງກະໂປໃນໂລກທວີດເຕີ ໄດ້ພ້ອມໃຈກັນຕິດແຮດແທັກ#ລີກວນຢູ ພ້ອມກັບຂໍ້ຄວາມໄວ້ອາໄລ ແລະຍ້ອງຍໍສັນລະເສີນ ບົດບາດດ້ານການບໍລິຫານປະເທດ ໃນອະດີດທີ່ໄດ້ຊື່ວ່າບິດາແຫ່ງສິງກະໂປ ໃນຍຸກໃໝ່ ທີ່ມີບົດບາດສຳຄັນໃນການ ສະຖາປະນາປະເທດສິງກະໂປຢ່າງເປັນທາງການ.
ແລະທີ່ສຳຄັນ ທ່ານ ລີກວນຢູ ຍັງເປັນຜູ້ນຳທີ່ມີຄວາມສາມາດ ໃນການສ້າງປະເທດສິງກະໂປ ຈາກປະເທດທີ່ເປັນເກາະນ້ອຍໆ ບໍ່ມີຊັບພະຍາກອນຫຍັງຫຼາຍ ໃຫ້ກາຍເປັນປະເທດທີ່ຈະເລີນ ເຂັ້ມແຂງທາງດ້ານເສດຖະກິດ ປະເທດໜຶ່ງຂອງໂລກກໍຄືໃນອາຊ່ຽນ ຈົນກາຍເປັນແບບຢ່າງໃນການບໍລິຫານ ແລະພັດທະນາປະເທດຊາດ ໃຫ້ແກ່ຫຼາຍໆປະເທດຕ້ອງທອດຖອນບົດຮຽນ.
ທ່ານ ລີ ກວນ ຢູ ເຂົ້າຮັບການປິ່ນປົວ ຢູ່ທີ່ໂຮງໝໍສິງກະໂປເຈີເນຣັນ ຕັ້ງແຕ່ວັນທີ 5 ກຸມພາ 2015 ທີ່ຜ່ານມາ ຈາກອາການອັກເສບປອດ ກ່ອນທີ່ອາການຈະຊຸດໂຊມລົງຕໍ່ເນື່ອງ ຕັ້ງແຕ່ອາທິດແລ້ວນີ້.