ທີມ​ຄົ້ນ​ຫາ ແລະ ກູ້​ໄພ​ອິນ​ໂດ​ເນ​ເຊຍ ຢຸ​ຕິ​ປະ​ຕິ​ບັດ​ການ​ຄົ້ນ​ຫາ​ເຮືອ​ບິນ ຖ້ຽວ​ບິນ QZ8501 ທັງ​ໝົດ​ແລ້ວ ຈາກ​ອຸ​ບັດ​ເຫດ​ຕົກ​ລົງ​ທະ​ເລ​ຊະ​ວາ ເມື່ອ​ທ້າຍ​ປີ​ຜ່ານ​ມາ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 18 ມີ​ນາ​ນີ້​ວ່າ ຈາກ​ອຸ​ບັດ​ເຫດ​ເຮືອ​ບິນ​ໂດຍ​ສານ​ຂອງ​ສາຍ​ການ​ບິນ​ ແອ​ຣ໌ ເອ​ເຊຍ ອິນ​ໂດ​ເນ​ເຊຍ ຖ້ຽວ​ບິນ QZ8501 ຈາກ​ເສັ້ນ​ທາງ​ບິນ​ເມືອງ​ສຸ​ຣາ​ບາ​ຢາ ປະ​ເທດ​ອິນ​ໂດ​ເນ​ເຊຍ ມຸ່ງ​ໜ້າ​ໄປ​ສູ່​ຈຸດ​ໝາຍ​ປາຍ​ທາງ​ທີ່​ປະ​ເທດ​ສິງ​ກະ​ໂປ ໃນ​ມື້​ວັນ​ທີ 28 ທັນ​ວາ​ 2014 ຜ່ານ​ມາ​ນັ້ນ ໄດ້​ຕົກ​ລົງ​ທະ​ເລ​ຊະ​ວາ ທ່າມ​ກາງ​ອາ​ກາດ​ທີ່​ມີ​ພາ​ຍຸ​ຟ້າ​ຄະ​ນອງ ເຊິ່ງ​ມີ​ຜູ້​ໂດຍ​ສານ ແລະ ລູກ​ເຮືອ​ເສຍ​ຊີ​ວິດ ລວມ 162 ຄົນ.

ອຸ​ບັດ​ເຫດ​ດັ່ງ​ກ່າວ​ນີ້ ໄດ້​ເຮັດ​ໃຫ້​ນາໆ​ປະ​ເທດ​ສົ່ງ​ເຮືອ ແລະ ເຮືອ​ບິນ​ເຂົ້າ​ຮ່ວມ​ຄົ້ນ​ຫາ ທັງ​ຊາກ​ຂອງ​ເຮືອ​ບິນ ແລະ ສົບ​ຂອງ​ຜູ້​ເສຍ​ຊີ​ວິດ​ຢ່າງ​ຕໍ່​ເນື່ອງ ຈົນ​ມາ​ຮອດ​ທ້າຍ​ອາ​ທິດ​ທີ່​ຜ່ານ​ມາ ການ​ຄົ້ນ​ຫາ​ໄດ້​ຫລຸດ​ລະ​ດັບ​ລົງ ເມື່ອ​ເຮືອ​ຂອງ​ຕ່າງ​ປະ​ເທດ​ໄດ້​ເລີ່ມ​ຖອນ​ກຳ​ລັງ​ກັບ​ໄປ ເຫລືອ​ພຽງ​ແຕ່​ເຮືອ​ຂອງກອງ​ທັບ​ອິນ​ໂດ​ເນ​ເຊຍ ທີ່​ຍັງ​ຄົງ​ໃຊ້​ກຳ​ລັງ​ທະ​ຫານ ແລະ ອຸ​ປະ​ກອນ​ເຄື່ອງ​ມື​ໃນ​ການ​ຄົ້ນ​ຫາ​ຢູ່.  ລ່າ​ສຸດ ເຮືອ 4 ລຳ​ຂອງ​ສຳ​ນັກ​ຄົ້ນ​ຫາ ແລະ ກູ້​ໄພ​ພົນ​ລະ​ເຮືອນ ໄດ້​ເລີ່ມ​ຖອນ​ກັບ​ຄືນ​ນະ​ຄອນ​ຫລວງ​ຈາ​ກາ​ຕາ ໃນ​ຕອນ​ເຊົ້າ​ຂອງ​ມື້​ນີ້ (18 ມີ​ນາ) ແລ້ວ ໂດຍ​ລວມ​ຈຳ​ນວນ​ສົບ​ທີ່​ຄົ້ນ​ພົບ ແມ່ນ​ຢູ່​ທີ່ 106 ສົບ.