ຜູ້​ຈັດ​ການ​ຮ້ານ​ບັນ​ເທີງ​ຊາວ​ນິວ​ຊີ​ແລນ ຖືກ​ສານ​ຈຳ​ຄຸກ 2 ປີເຄິ່ງ ຖານ​ໂພ​ສ​ຕ໌​ຮູບ​ພະ​ພຸດ​ທະ​ຮູບ​ສວມ​ຫູ​ຟັງ ເພື່ອ​ໂຄ​ສະ​ນາ​ເຄື່ອງ​ດື່ມ​ລົງ​ທາງ​ເຟ​ສ​ບຸກ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 17 ມີ​ນາ​ຜ່ານ​ມາ​ນີ້​ວ່າ ຜູ້​ຈັດ​ການ​ຮ້ານ​ບັນ​ເທີງ​ຊາວ​ນິວ​ຊີ​ແລນ ແລະ ​ເພື່ອນ​ຮ່ວມ​ງານ​ຊາວ​ມຽນ​ມ້າ​ອີກ 2 ຄົນ ໄດ້​ຖືກ​ສານ​ນະ​ຄອນ​ຢາງ​ກຸ້ງ​ຂອງ​ມຽນ​ມ້າ ຕັດ​ສິນ​ຈຳ​ຄຸກ 2 ປີ 6 ເດືອນ ເນື່ອງ​ຈາກ​ໃຊ້​ພະ​ພຸດ​ທະ​ຮູບ​ໃນ​ການ​ສົ່ງ​ເສີມ​ການ​ຂາຍເຄື່ອງ​ດື່ມ​ລາ​ຄາ​ຖືກ​ຂອງ​ຮ້ານ.

ທ້າວ ຟິ​ລິບ ແບ​ລັກ​ວູ໊ດ ເຊິ່ງ​ເປັນ​ຜູ້​ຈັດ​ການ​ໃນ​ຮ້ານ​ບັນ​ເທີງ VGastro ໃນ​ນະ​ຄອນ​ຢາງ​ກຸ້ງ ໄດ້​ຮ່ວມ​ກັນ​ກັບ​ເຈົ້າ​ຂອງ​ຮ້ານ​ຊາວ​ມຽນ​ມ້າ ແລະ ຜູ້​ຈັດ​ການ​ຊາວ​ມຽນ​ມ້າອີກ 1 ຄົນ ໄດ້​ໂພ​ສ​ຕ໌​ຮູບ​ພະ​ພຸດ​ທະ​ຮູບ ສວມ​ຫູ​ຟັງ​ດີ​ເຈ​ລົງ​ໃນ​ເຟ​ສ​ບຸກ ເຊິ່ງ​ຖື​ເປັນ​ຄວາມ​ຜິດ​ຕາມ​ກົດ​ໝາຍ​ມຽນ​ມ້າ ຖານ​ດູ​ໝິ່ນ​ສາ​ສະ​ໜາ.