ເກີດເຫດສະຫລົດໃຈ ເມື່ອເດັກນ້ອຍຫວຽດນາມອາຍຸ 5 ປີ ຖືກເຊືອກວ່າວກ່ຽວຂາເຫີນຂຶ້ນຟ້າ ກ່ອນຕົກລົງມາກະແທກພື້ນເສຍຊີວິດ.
ສຳນັກຂ່າວຕ່າງປະເທດ ລາຍງານໃນວັນທີ 17 ມີນາຜ່ານມານີ້ວ່າ ເຫດການດັ່ງກ່າວນີ້ ເກີດຂຶ້ນໃນປະເທດຫວຽດນາມ ເຊິ່ງເປັນເທສະການຫລິ້ນວ່າວຂອງຊາວຫວຽດນາມ ແຕ່ໄດ້ເກີດເຫດບໍ່ຄາດຝັນເກີດຂຶ້ນ ເມື່ອວ່າວຂະໜາດໃຫຍ່ທີ່ກຳລັງປິວຂຶ້ນສູ່ເທິງຟ້າ ເກີດເຊືອກມັດວ່າວໄປກ່ຽວເອົາຂາເດັກນ້ອຍຜູ້ເຄາະຮ້າຍ ຈົນເຮັດໃຫ້ຮ່າງຂອງເດັກຖືກລອຍຂຶ້ນເທິງຟ້າ ສູງປະມານ 20 ແມັດ ກ່ອນທີ່ຮ່າງຂອງເດັກນ້ອຍຜູ້ເຄາະຮ້າຍດັ່ງກ່າວ ຈະຕົກລົງກະແທກພື້ນເສຍຊີວິດ.
ຜູ້ເຫັນເຫດການ ໄດ້ພາກັນນຳເອົາເດັກນ້ອຍຄົນດັ່ງກ່າວສົ່ງໂຮງໝໍ ແຕ່ດ້ວຍທົນພິດບາດເຈັບບໍ່ໄຫວ ຈິ່ງເສຍຊີວິດໃນເວລາຕໍ່ມາ.