ທະນາຄານພັດທະນາອາຊີ (ADB)ໄດ້ອະນຸມັດທຶນກູ້ຢືມຈຳນວນ 35 ລ້ານໂດລາສະຫະລັດ ຫຼື ປະມານ 280 ຕື້ກີບ ໃຫ້ລັດຖະບານແຫ່ງ ສປປ ລາວ ເພື່ອສະໜອງໃຫ້ການສ້າງລະບົບຂົນສົ່ງໃໝ່ ດ້ວຍລົດເມສາຍດ່ວນ ແລະ ສິ່ງອຳນວຍຄວາມສະດວກຕ່າງໆ ທີ່ຕິດພັນກັບການຂົນສົ່ງ ແນໃສ່ເພື່ອແກ້ໄຂບັນຫາການສັນຈອນແອອັດຢູ່ນະຄອນຫຼວງວຽງຈັນ ທີ່ມີການຂະຫຍາຍຕົວຢ່າງວ່ອງໄວ.
ພິທີລົງນາມສັນຍາເງິນກູ້ດັ່ງກ່າວ ໄດ້ຈັດຂຶ້ນວັນທີ 12 ມີນາ 2015 ຢູ່ໂຮງແຮມດອນຈັນພາເລດ ລະຫວ່າງທ່ານ ດຣ. ລຽນ ທິແກ້ວ ລັດຖະມົນຕີວ່າການກະຊວງການເງິນ ແລະ ທ່ານ ທາເຄຮີໂກະ ນາກາໂອະ ປະທານ ADB ໂດຍຊ້ອງໜ້າພະນັກງານກ່ຽວຂ້ອງ ແລະ ແຂກຖືກເຊີນ.
ລະບົບຂົນສົ່ງດ້ວຍລົດເມສາຍດ່ວນ ປະກອບມີຊ່ອງທາງຈະລາຈອນສະເພາະ ເຊິ່ງມີຄວາມຍາວປະມານ 11 ກິໂລແມັດ ມີສະຖານີຈອດ 24 ຈຸດ ແລະ ມີລົດເມທີ່ປ່ອຍອາຍກາກໂບນິກຕ່ຳຫຼາຍກວ່າ 90 ຄັນ ໄວ້ຄອຍບໍລິການ ໂຄງການນີ້ຍັງໄດ້ຮັບທຶນເພື່ອປັບປຸງການຄຸ້ມຄອງການສັນຈອນ ໃນເຂດໃຈກາງເມືອງ ໃນນີ້ລວມມີການຕິດຕັ້ງໄຟສັນຍານຈະລາຈອນໃນເຂດ 4 ແຍກ ພ້ອມທັງປັບປຸງສູນກາງຄວບຄຸມລະບົບການສັນຈອນ ມີການຕິດຕັ້ງລະບົບການເສຍຄ່າຈອດລົດ ແລະ ການຂຶ້ນທະບຽນຍານພາຫະນະດ້ວຍລະບົບເອເລັກໂຕຣນິກ ນອກນີ້ຍັງຈະມີການປັບປຸງທາງຄົນຍ່າງຕື່ມອີກ.
ທະນາຄານເພື່ອການລົງທຶນເອີຣົບ ກອງທຶນສະຫະພາບເອີຣົບ ເພື່ອການລົງທຶນໃນອາຊີ ກອງທຶນສິ່ງແວດລ້ອມໂລກ ກອງທຶນຜູ້ສົ່ງອອກນ້ຳ ເພື່ອການພັດທະນາສາກົນ ແລະ ພາກສ່ວນເອກະຊົນ ກໍ່ຈະສະໜອງທຶນສົມທົບທີ່ຈະໄດ້ຮັບອະນຸມັດລວມມູນຄ່າ 50 ລ້ານໂດລາສະຫະລັດ ຫຼື ປະມານ 400 ຕື້ກີບ ພ້ອມທຶນສົມທົບຂອງລັດຖະບານລາວ 14,5 ລ້ານກີບ ຫຼື ປະມານ 116 ຕື້ກີບ ໃນນີ້ ADB ຈະເປັນຜູ້ບໍລິຫານທຶນກູ້ຢືມ ທີ່ຈະໄດ້ຮັບຈາກກອງທຶນຜູ້ສົ່ງອອກນ້ຳ ເພື່ອການພັດທະນາສາກົນ 15 ລ້ານໂດລາສະຫະລັດ ຫຼື ປະມານ 120 ຕື້ກີບ ແລະ 2 ລ້ານໂດລາສະຫະລັດ ຫຼື ປະມານ 16 ຕື້ກີບ ຈາກກອງທຶນສິ່ງແວດລ້ອມໂລກ ໂຄງການນີ້ ຈະດຳເນີນໄປເປັນເວລາ 5 ປີ ເຊິ່ງຄາດວ່າຈະສຳເລັດໃນເດືອນມິຖຸນາ 2020.
ແຫລ່ງຂ່າວ: ວຽງຈັນໃໝ່