ໂຄສົກກະຊວງການຕ່າງປະເທດສະຫະລັດ ອອກມາປັດຂ່າວແຜນເຈລະຈາກັບຜູ້ນຳຊີເຣຍ ພ້ອມຢ້ຳແຜນສັນຕິພາບຊີເຣຍ ຕ້ອງບໍ່ມີ ບາຊາ ອັນ-ອັດຊາດ ເຂົ້າຮ່ວມ.
ສຳນັກຂ່າວຕ່າງປະເທດ ລາຍງານໃນວັນທີ 17 ມີນານີ້ວ່າ ໂຄສົກກະຊວງການຕ່າງປະເທດສະຫະລັດອາເມຣິກາ ໄດ້ອອກມາຖະແຫລງໃນມື້ວານນີ້ (16 ມີນາ) ວ່າ ລັດຖະບານສະຫະລັດອາເມຣິກາ ບໍ່ມີແຜນເປີດການເຈລະຈາກັບ ປະທານາທິບໍດີ ບາຊາ ອັນ-ອັດຊາດ ຜູ້ນຳຂອງຊີເຣຍແຕ່ຢ່າງໃດ, ກ່ອນໜ້ານີ້ ເມື່ອທ້າຍອາທິດທີ່ຜ່ານມາ ທ່ານ ຈອນ ແຄຣີ ລັດຖະມົນຕີການຕ່າງປະເທດສະຫະລັດເອງ ໄດ້ໃຫ້ສຳພາດຜ່ານເຄືອຂ່າຍສະຖານີໂທລະພາບຊີບີເອັສ ໂດຍໄດ້ລະບຸວ່າ ໃນທ້າຍທີ່ສຸດແລ້ວ ສົງຄາມກາງເມືອງຢູ່ຊີເຣຍ ຈະຢຸຕິລົງໄດ້ກໍດ້ວຍວິທີການເຈລະຈາເທົ່ານັ້ນ ແລະ ບອກວ່າສະຫະລັດເອງ ກຳລັງຫາທາງຊຸກຍູ້ໃຫ້ຜູ້ນຳຊີເຣຍຍອມເຂົ້າຮ່ວມການເຈລະຈາ. ແນວໃດກໍຕາມ, ພາຍຫລັງການຖະແຫລງຂອງທ່ານ ຈອນ ແຄຣີ ບໍ່ພໍເທົ່າໃດມື້ ໂຄສົກຍິງຂອງກະຊວງການຕ່າງປະເທດສະຫະລັດ ກໍຟ້າວອອກມາຖະແຫລງປະຕິເສດແຜນການເຈລະຈາກັບຜູ້ນຳຊີເຣຍໂດຍທັນທີ ພ້ອມທັງລະບຸວ່າ ລັດຖະບານອາເມຣິກາເອງ ມີຄວາມພ້ອມທີ່ຈະເຈລະຈາກັບຜູ້ແທນຂອງລັດຖະບານຊີເຣຍ ແຕ່ຈະບໍ່ມີການເຈລະຈາໂດຍກົງກັບຜູ້ນຳຊີເຣຍ ພ້ອມທັງຕອກຢ້ຳອີກວ່າ ແຜນສັນຕິພາບຊີເຣຍ ທີ່ຈະເກີດຂຶ້ນໃນອານາຄົດນັ້ນ ຈະບໍ່ມີຊາຍທີ່ຊື່ ບາຊາ ອັນ-ອັດຊາດ ເຂົ້າມາມີສ່ວນຮ່ວມແຕ່ຢ່າງໃດ.