ທູດຣັດເຊຍປະຈຳຫວຽດນາມ ລະບຸການພົວພັນທາງການທະຫານລະຫວ່າງຣັດເຊຍ ແລະ ຫວຽດນາມ ບໍ່ເປັນໄພຄຸກຄາມໃດໆ.
ສຳນັກຂ່າວຕ່າງປະເທດ ລາຍງານໃນວັນທີ 16 ມີນາຜ່ານມານີ້ວ່າ ທ່ານ ຄອນສະແຕນຕິນ ວະນູຄັອບ ເອກອັກຄະລັດຖະທູດຣັດເຊຍ ປະຈຳຫວຽດນາມຄົນໃໝ່ໄດ້ກ່າວວ່າ ຄວາມຮ່ວມມືທາງການທະຫານ ແລະ ເຕັກໂນໂລຊີທາງການທະຫານລະຫວ່າງສອງປະເທດ ບໍ່ໄດ້ເປັນໄພຄຸກຄາມຕໍ່ຄວາມໝັ້ນຄົງໃນພາກພື້ນ ລວມທັງໃນທົ່ວໂລກ. ໃນປີນີ້ ຫວຽດນາມ ແລະ ຣັດເຊຍ ຈະສະຫລອງຄວາມສຳພັນສອງຝ່າຍ ຄົບຮອບ 65 ປີ ໂດຍໃນໂອກາດດັ່ງກ່າວ ທ່ານ ນາຍົກລັດຖະມົນຕີ ດິມິທຣີ ເມດເວເດບ ຂອງຣັດເຊຍ ຈະເດີນທາງງມາຢ້ຽມຢາມ ສາທາລະນະລັດສັງຄົມນິຍົມຫວຽດນາມ ແລະ ປະທານາທິບໍດີ ເຈື່ອງ ເຕິນ ຊາງ ຂອງຫວຽດນາມ ກໍຈະເດີນທາງໄປຢ້ຽມຢາມຣັດເຊຍເຊັ່ນດຽວກັນ.
ສຳລັບບັນຫາຄວາມເຄັ່ງຕຶງໃນທະເລຈີນໃຕ້ ທ່ານທູດຣັດເຊຍປະຈຳຫວຽດນາມໄດ້ກ່າວວ່າ ຣັດເຊຍສະໜັບສະໜູນການແກ້ໄຂບັນຫາຂໍ້ພິພາດ ດ້ວຍສັນຕິວິທີ ບົນພື້ນຖານຂອງການເຈລະຈາ ແລະ ກົດໝາຍລະຫວ່າງປະເທດ.