ທ້າວ ກ້ອງກຽດ ທະນາວຸດທິໄຊ ອາຍຸ 33 ປີສັນຊາດໄທ ຢູ່ບ້ານຟ້າທະຍານ, ທ້າວ ຈີວັດທະນາ ສອນພັນ ອາຍຸ 31 ປີສັນຊາດໄທ ຢູ່ບ້ານຫ້ວຍຄູ ເມືອງວຽງແກ່ນ ແຂວງຊຽງລາຍ ປະເທດໄທ ແລະ ທ້າວ ເສິກ ອາຍຸ 21 ປີຢູ່ບ້ານຫ້ວຍຊາຍໃຕ້ ເມືອງຫ້ວຍຊາຍ ແຂວງບໍ່ແກ້ວ ຖືກສານປະຊາຊົນແຂວງອຸດົມໄຊຕັດສິນ ລົງໂທດປະຫານຊີວິດເມື່ອອາທິດຜ່ານມາ, ໃນຂໍ້ຫາຄ້າເຮໂລອິນ, ໂດຍພວກກ່ຽວຖືກເຈົ້າໜ້າທີ່ຈັບຕົວໄດ້ ຢູ່ເສັ້ນທາງລະຫວ່າງແຂວງອຸດົມໄຊຫາຫລວງພະບາງ, ໃນຂະນະພາກັນຂັບຂີ່ລົດກະບະອີຊູຊຸດີແມກສີດຳ ໝາຍເລກທະບຽນ ຂຍ 4627 ຊຽງໃໝ່ ນຳເອົາເຮໂລອີນ ຈຳນວນ 4 ແທ່ງໄປສົ່ງໃຫ້ລູກຄ້າຢູ່ແຂວງຫລວງພະບາງ ເມື່ອວັນທີ 4 ກໍລະກົດ 2014. ເຊິ່ງພວກກ່ຽວຮັບສາລະພາບ ຕໍ່ເຈົ້າໜ້າທີ່ວ່າ: ເຮໂລອິນ ທັງໝົດແມ່ນຊື້ມາຈາກຂະບວນການຄ້າຢາເສບຕິດຢູ່ບ້ານມ້ອມ ເມືອງຕົ້ນເຜີ້ງ ແຂວງບໍ່ແກ້ວ ເພື່ອຈະເອົາໄປຈຳໜ່າຍໃຫ້ລູກຄ້າຢູ່ແຂວງຫລວງພະບາງ.
ຂ່າວໃຫ້ຮູ້ຕື່ມວ່າ: ໃນຕົ້ນເດືອນມີນານີ້, ເຈົ້າໜ້າທີ່ ປສກ ເມືອງສີໂຄດຕະບອງ ນະຄອນຫລວງວຽງຈັນ ໄດ້ລົງແກ້ ໄຂໄວໜຸ່ມມົ້ວສຸມຢາເສບຕິດຢູ່ບ້ານໂພນສົມບູນ, ສາມາດຈັບຜູ້ມົ້ວສຸມ ແລະ ຄ້າຂາຍຢາເສບຕິດໄດ້ 7 ຄົນ, ໃນນັ້ນ ສອງຄົນແມ່ນຜູ້ຄ້າຂາຍຢາບ້າຄື: ທ້າວ ປະກາຍທອງ(ແກະ) ອາຍຸ 30 ປີ ແລະ ທ້າວ ນຸ່ຍ ອາຍຸ 27 ປີ, ພ້ອມ ຂອງກາງ ຢາບ້າ 123 ເມັດ, ຈຶ່ງຍຶດໄວ້ເປັນຫລັກຖານໃນການດຳເນີນຄະດີຕາມລະບຽບກົດໝາຍ. ສ່ວນໄວລຸ້ນ 5 ຄົນທີ່ມາຮ່ວມມົ້ວສຸມຢາເສບຕິດເຈົ້າໜ້າທີ່ໄດ້ນຳຕົວສົ່ງໄປຢູ່ສູນບຳບັດຢາເສບຕິດນະຄອນຫລວງວຽງຈັນ.
ແຫລ່ງຂ່າວ: ລາວພັດທະນາ