ການເດີນທາງຢ້ຽມຢາມ ສປປ ລາວ ຄັ້ງທຳອິດຂອງທ່ານ ທາເຄຮີໂກະ ນາກາໂອະ ປະທານທະນາຄານພັດທະນາອາຊີ (ເອດີບີ) ໄດ້ເຂົ້າພົບປະຫາລືກັບລັດຖະມົນຕີຫຼາຍກະຊວງທີ່ເອດີບີໃຫ້ການ ຊ່ວຍເຫຼືອ ເພື່ອປຶກສາລືກ່ຽວກັບການສະໜັບສະໜູນຂອງເອດີບີເຖິງຄວາມ ພະຍາຍາມໃນການຮັກສາການຂະຫຍາຍຕົວທາງເສດຖະກິດໃນໄລຍະຜ່ານມາ ໃຫ້ມີຄວາມໝັ້ນຄົງ ແລະ ປະຊາຊົນໄດ້ຮັບຜົນປະໂຫຍດ ຊຶ່ງໄດ້ໂອ້ລົມກັນໃນຫຼາຍຫົວຂໍ້ລວມທັງຄວາມສຳຄັນຂອງພາກເອກະຊົນ ໂດຍທ່ານໄດ້ແນະນຳໃຫ້ລັດຖະບານຍົກສູງການສົ່ງເສີມບັນດາວິສາຫະ ກິດທີ່ເປັນກຳລັງແຮງ ຫຼັກຂັບເຄື່ອນການພັດທະນາເສດຖະກິດຂອງປະເທດດ້ວຍການປັບປຸງ ບັນດານິຕິກຳໃຫ້ເປັນມິດກັບນັກລົງທຶນ ແລະ ງ່າຍດາຍຂຶ້ນໃນຂອດການປະຕິບັດ.
ທ່ານປະທານທະນາຄານພັດທະນາອາຊີກ່າວຕໍ່ສື່ມວນຊົນເມື່ອວັນທີ 12 ມີ ນານີ້ວ່າ: ເສດຖະກິດຂອງປະເທດຂະຫຍາຍຕົວຢ່າງແຂງແຮງ ກໍເນື່ອງມາຈາກການຊົມໃຊ້ຂອງພາກເອກະຊົນດ້ວຍເຫດນີ້ການປະຕິຮູບ ເພື່ອສົ່ງເສີມ ການພັດທະນາໃນບັນດາວິສາຫະກິດໃຫ້ເປັນເຄື່ອງຈັກຂັບເຄື່ອນການ ຂະຫຍາຍຕົວແມ່ນມີຄວາມສຳຄັນຫຼາຍ ໂດຍສະເພາະການແກ້ໄຂບັນດາລະບຽບການທາງດ້ານທຸລະກິດທີ່ຊັບຊ້ອນ ໃຫ້ງ່າຍດາຍຂຶ້ນ, ມີໂຄງສ້າງອາກອນທີ່ຈະແຈ້ງ ແລະ ສາມາດຄາດເດົາໄດ້ ພ້ອມດຽວກັນນີ້ຕ້ອງປັບປຸງການເຂົ້າເຖິງແຫຼ່ງທຶນຂອງຫົວໜ່ວຍທຸລະ ກິດຂະໜາດນ້ອຍ.
ເພື່ອສ້າງເງື່ອນໄຂທີ່ເອື້ອອຳນວຍແກ່ພາກເອກະຊົນຫວ່າງບໍ່ດົນມາ ນີ້ ລັດຖະບານໄດ້ເປີດສູນປະເມີນຜົນກະທົບ ດ້ານລະບຽບການສຳລັບຮ່າງກົດໝາຍທີ່ຈະມີຜົນຕໍ່ບັນດາຫົວໜ່ວຍ ທຸລະກິດ ໂດຍການຊ່ວຍເຫຼືອຂອງເອີດີບີ, ທ່ານ ທາເຄຮີໂກະ ນາກາໂອະ ກ່າວວ່າ: ພາກທຸລະກິດຈະສາມາດຂະຫຍາຍຕົວໃນຈັງຫວະທີ່ດີຖ້າຫາກບັນດາ ລະບຽບການທາງເສດຖະກິດໄດ້ຮັບການແກ້ໄຂ ພ້ອມດຽວກັນນີ້ການປັບປຸງສະພາບແວດລ້ອມທາງທຸລະກິດກໍມີສ່ວນຊ່ວຍ ສະໜັບສະໜູນການຂະຫຍາຍຕົວຂອງການມີສ່ວນຮ່ວມລະຫວ່າງພາກລັດ ແລະ ເອກະຊົນ ດ້ວຍວິທີການສະໜອງທຶນເຂົ້າໃນການກໍ່ສ້າງພື້ນຖານໂຄງລ່າງທີ່ ຈຳເປັນ ເຊັ່ນ: ເສັ້ນທາງ, ສະໜາມບິນ ແລະ ການບໍລິການເທດສະບານທີ່ຄວນມີ ເພື່ອຮອງຮັບການລົງທຶນຄ້າຂາຍຂອງພາກທຸລະກິດກຳລັງສຳຄັນຊຸກຍູ້ ອັດຕາການເຕີບໂຕທາງເສດຖະກິດ.
ໃນປະເດັນດຽວກັນກັບການສົ່ງເສີມການມີສ່ວນຮ່ວມຂອງພາກເອກະ ຊົນເຂົ້າໃນການພັດທະນາເສດຖະກິດເອດີບີ ຍັງເຫັນວ່າ ສປປ ລາວ ເປັນສະມາຊິກຂອງກຸ່ມອະນຸພາກພື້ນແມ່ນ້ຳຂອງພຽງປະເທດດຽທີ່ມີ ຊາຍແດນຕິດຈອດກັບ 5 ປະເທດ ດັ່ງນັ້ນ ຈິ່ງມີຄວາມເໝາະສົມຢ່າງຍິ່ງທີ່ຈະໄດ້ຮັບຜົນປະໂຫຍດຈາກການຮ່ວມມື ແລະ ການເຊື່ອມໂຍງໃນອະນຸພາກພື້ນໂດຍສະເພາະ 3 ແລວທາງເສດຖະກິດຂອງອະນຸພາກພື້ນແມ່ນ້ຳຂອງ (ແລວທາງເສດຖະກິດເໜືອ-ໃຕ້, ຕາເວັກອອກ-ຕາເວັນຕົກ ແລະ ແລວທາງເສດຖະກິດຕອນໃຕ້) ແຕ່ສິ່ງທ້າທາຍຢ່າງໜຶ່ງຄືການຮັບປະກັນໃຫ້ປະເທດລາວໄດ້ການ ລົງທຶນ ແລະ ການສ້າງວຽກເຮັດງານທຳຈາກການເຊື່ອມໂຍງຫາກບໍ່ແມ່ນເປັນພຽງທາງຜ່ານ ເພື່ອການຄ້າຂອງບັນດາປະເທດເພື່ອນບ້ານເທົ່ານັ້ນ.
ທ່ານ ທາເຄຮີໂກະ ນາກາໂອະ ໃຫ້ໄດ້ຄຳໝັ້ນສັນຍາວ່າ: ເອດີບີ ຈະສືບຕໍ່ໃຫ້ການຊ່ວຍເຫຼືອ ສປປ ລາວ ດ້ວຍການສະໜອງເງິນກູ້ດອກເບ້ຍຕ່ຳຈາກກອງ ທຶນພັດທະນາອາຊີໃນປີ 2015 ແລະ 2016 ດ້ວຍມູນຄ່າ 116,6 ລ້ານໂດລາ ເຂົ້າໃນການສ້າງຄວາມເຂັ້ມແຂງໃນຂະແໜງການສຶກສາ, ການພັດທະນາແລວທາງເສດຖະກິດ, ເພີ່ມທະວີການຄຸ້ມຄອງທີ່ດີໃນລະບົບການຂົນສົ່ງ ແລະ ປັບປຸງຂອດບໍລິການດ້ານສາທາລະນະສຸກ.
ໃນໂອກາດທີ່ປະທານຂອງເອດີບີມາຢ້ຽມລາວ ສປປ ລາວ ຄັ້ງນີ້ ທ່ານຍັງໄດ້ເຂົ້າຮ່ວມເປັນສັກຂີພິຍານໃນພິທີເຊັນສັນຍາທຶນກູ້ ຢືມມູນຄ່າ 280 ຕື້ກີບ ຫຼື 35 ລ້ານໂດລາ ເພື່ອສະໜອງເຂົ້າໃນການປັບປຸງລະບົບຂົນສົ່ງສາທາລະນະໃນນະຄອນ ຫຼວງວຽງຈັນ ເປັນຕົ້ນແມ່ນການຄຸ້ມຄອງການສັນຈອນ, ສ້າງລານຈອດລົດ, ທາງຄົນຍ່າງອື່ນໆ.
ທ່ານ ທາເຄຮີໂກະ ນາກາໂອະ ເຊື່ອວ່າ ຄວາມຫຍຸ້ງຍາກທີ່ເກີດຈາກການຂະຫຍາຍຕົວຢ່າງວ່ອງໄວຂອງຕົວເມືອງ ເມື່ອທຽບກັບພື້ນຖານໂຄງລ່າງ ແລະ ການບໍລິການຈະສາມາດແກ້ໄຂໄດ້ໂດຍການສ້າງຜັງເມືອງ ແລະ ການບໍລິການທີ່ດີກວ່າເກົ່າ.
ແຫລ່ງຂ່າວ: ເສດຖະກິດ – ສັງຄົມ