ລັດຖະບານໂຮນລັງ ສັ່ງຂ້າໄກ່ 30,000 ກ່ວາໂຕ ຫລັງພົບການລະບາດຂອງໄຂ້ຫວັດສັດປີກ ພ້ອມຍັງບໍ່ສາມາດລະບຸສາຍພັນໄດ້.
ສຳນັກຂ່າວຕ່າງປະເທດ ລາຍງານໃນວັນທີ 12 ມີນາຜ່ານມານີ້ວ່າ ລັດຖະບານໂຮນລັງ ສັ່ງຂ້າໄກ່ 30,000 ໂຕ ຫລັງພົບການລະບາດຂອງໄຂ້ຫວັດສັດປີກ ໃນຟາມລ້ຽງໄກ່ແບບປ່ອຍ ໃກ້ເມືອງບາເນເວວ ທາງພາກຕາເວັນອອກຂອງປະເທດ ໂດຍໃນຖ້ອຍຖະແຫລງຂອງລັດຖະບານລະບຸວ່າ ຍັງບໍ່ສາມາດສະຫລຸບວ່າເປັນໄຂ້ຫວັດສັດປີກສາຍພັນໃດ ແຕ່ສັນນິຖານວ່າ ໜ້າຈະແມ່ນສາຍພັນທີ່ເບົາ ແລະ ບໍ່ແມ່ນສາຍພັນທີ່ຮຸນແຮງ ທີ່ສ້າງຄວາມເສຍຫາຍໃຫ້ແກ່ບັນດາຟາມຕ່າງໆພາຍໃນປະເທດ ເມື່ອປີທີ່ຜ່ານມາ.
ທັງນີ້ ປະເທດໂຮນລັງ (ເນເທີແລນ) ຄືໜຶ່ງໃນປະເທດທີ່ມີການຜະລິດກະສິກຳຂະໜາດໃຫຍ່ ແລະ ເປັນປະເທດຜູ້ສົ່ງອອກດ້ານກະສິກຳ ອັນດັບ 2 ຂອງໂລກ ໂດຍເມື່ອປີທີ່ແລ້ວ ມີມູນຄ່າການສົ່ງອອກ 79,000 ລ້ານເອີໂຣ ແລະ ດ້ວຍຟາມຈຳນວນຫລາຍ ຕັ້ງຢູ່ໃນຂອບເຂດພື້ນທີ່ຂະໜາດນ້ອຍ ໄດ້ກາຍເປັນສາເຫດຂອງພະຍາດຕິດຕໍ່ສາມາດແຜ່ລະບາດໄດ້ຢ່າງວ່ອງໄວ.