ຈີນສັ່ງຫ້າມສັ່ງຊື້ງາຊ້າງເຂົ້າປະເທດຊົ່ວຄາວ ກຳນົດເວລາ 1 ປີ ເພື່ອປ້ອງກັນການລ່າຊ້າງໝົດປ່າ
ສຳນັກຂ່າວຕ່າງປະເທດ ລາຍງານໃນວັນທີ 4 ມີນາຜ່ານມານີ້ວ່າ ທາງການຈີນໄດ້ຍອມໃຫ້ມີການກຳນົດ ຫ້າມການສັ່ງງາຊ້າງເຂົ້າໃນປະເທດຊົ່ວຄາວ ໂດຍມີກຳນົດ 1 ປີ ທ່າມກາງຫາງສຽງສາກົນ ຕໍ່ກັບຄວາມນິຍົມງາຊ້າງຂອງຄົນຈີນ ໄດ້ເປັນຕົ້ນເຫດເຮັດໃຫ້ມີການລ່າຊ້າງປ່າເພື່ອການຄ້າ ຢ່າງກວ້າງຂວາງໃນຂອບເຂດທົ່ວໂລກ. ກົມປ່າໄມ້ຂອງຈີນກ່າວວ່າ ການກຳນົດດັ່ງກ່າວນີ້ ເປັນການດຳເນີນບາດກ້າວທຳອິດ ຂອງການປົກປ້ອງຄຸ້ມຄອງຊ້າງປ່າ ແລະ ຊີ້ແຈງວ່າ ທາງລັດຖະບານຈີນ ກໍພະຍາຍາມເລັ່ງມື ໃນການກຳຈັດການລັກລອບຄ້າຂອງເຖື່ອນ ໂດຍຫວັງຢ່າງຍິ່ງວ່າ ການລະງັບສັ່ງນຳເຂົ້າງາຊ້າງຊົ່ວຄາວນີ້ ຈະເຮັດໃຫ້ຫລຸດຄວາມຕ້ອງການງາຊ້າງໃຫ້ໜ້ອຍລົງໃນຕະຫລາດໂລກ.
ທັງນີ້ ຈີນຖືເປັນປະເທດທີ່ມີການສັ່ງງາຊ້າງເປັນສິນຄ້າເຂົ້າປະເທດ ລາຍໃຫຍ່ທີ່ສຸດໃນໂລກ ໂດຍເມື່ອ 6 ປີກ່ອນໜ້ານີ້ ມີຄັ້ງໜຶ່ງລັດຖະບານຈີນ ໄດ້ອະນຸມັດໃຫ້ມີການຊື້ງາຊ້າງຈາກອາຟຣິກາ ພຽງຖ້ຽວຂົນສົ່ງດຽວ ເປັນປະລິມານສູງເຖິງ 60 ໂຕນ.