ອິນເດຍສອບສວນລັດທິປະຫລາດ ຫລອກລວງໃຫ້ຜູ້ຊາຍສາວົກລັດທິ ໄປຕັດອັນທະຕົນເອງຖິ້ມ ເຊື່ອວ່າຈະເຮັດໃຫ້ໃກ້ຊິດພະເຈົ້າ.
ສຳນັກຂ່າວຕ່າງປະເທດ ລາຍງານໃນວັນທີ 2 ມີນາຜ່ານມານີ້ວ່າ ອິນເດຍເລັ່ງສືບສວນລັດທິແປກປະຫລາດ ທີ່ຫລອກລວງໃຫ້ຜູ້ຊາຍທີ່ນັບຖືລັດທິດັ່ງກ່າວ ຫລາຍກ່ວາ 400 ຄົນ ໄປຕັດອັນທະຂອງຕົນເອງຖິ້ມ ຍ້ອນເຊື່ອວ່າເຮັດແລ້ວຈະສາມາດໃກ້ຊິດກັບພະເຈົ້າຫລາຍຂຶ້ນ. ລັດທິດັ່ງກ່າວນີ້ ແມ່ນມີ ທ້າວ ກຸຣະມິດ ຣາມ ຣາຮຳ ຊິງ ນັກສະແດງຊາວອິນເດຍ ທີ່ຕັ້ງລັດທິດັ່ງກ່າວນີ້ຂຶ້ນໂດຍໃສ່ຊື່ວ່າ ເທຣະ ສາຊາ ຊາອຸດາ ໂດຍໄດ້ຫລອກລວງໃຫ້ຜູ້ຊາຍຫລາຍກ່ວາ 400 ຄົນ ເຊິ່ງເປັນສະມາຊິກຂອງລັດທິ ເຂົ້າຮັບການຜ່າຕັດເອົາອັນທະອອກ ອ້າງວ່າເຮັດແລ້ວຈະໃກ້ຊິດກັບພະເຈົ້າຫລາຍຂຶ້ນ ໂດຍເກືອບທັງໝົດແມ່ນເຂົ້າຮັບການຜ່າຕັດ ຢູ່ໃນໂຮງໝໍທີ່ເຂົາເອງເປັນເຈົ້າຂອງ ສ້າງລາຍໄດ້ໃຫ້ເຈົ້າຂອງລັດທິດັ່ງກາວຢ່າງມະຫາສານ.
ຢ່າງໃດກໍຕາມ ລັດທິດັ່ງກ່າວນີ້ຖືກຕັ້ງຂຶ້ນມາຫລາຍກ່ວາ 15 ປີແລ້ວ ແຕ່ຫາກໍມີຄົນອອກມາເວົ້າເຖິງກໍລະນີດັ່ງກ່າວ ເນື່ອງຈາກເຮັດໄປແລ້ວຮູ້ສຶກວ່າຕົນເອງຖືກຕົວະຕົ້ມ ເຮັດໃຫ້ທາງການອິນເດຍເອງ ກໍໄດ້ເຂົ້າມາສືບສວນເລື່ອງດັ່ງກ່າວນີ້ຢ່າງລະອຽດແລ້ວ.