ງານ “ເປີດໂລກແຫ່ງການລົງ ທຶນ” ເປັນໂອກາດຄັ້ງດຽວໃນໜຶ່ງປີທີ່ ຕະຫຼາດຫຼັກຊັບລາວຈັດຂຶ້ນ ເພື່ອເປັນເວທີແຫ່ງການສຶກສາຮຽນຮູ້ກ່ຽວກັບການລົງທຶນຮຸ້ນຂອງ ຜູ້ທີ່ມີຄວາມສົນໃຈເພາະໄດ້ເຕົ້າໂຮມທຸກພາກສ່ວນທີ່ກ່ຽວພັນກັບ ຕະຫຼາດທຶນເຂົ້າມາຮ່ວມວາງສະແດງ, ບໍລິການ ແລະ ອະທິບາຍຕອບຂໍ້ຊັກຖາມທີ່ຢາກໄດ້ຄຳຕອບຂອງເຫຼົ່ານັກລົງທຶນ.
ຕະຫຼາກຫຼັກຊັບລາວໄດ້ຈັດງານເປີດ ໂລກແຫ່ງການລົງທຶນຂຶ້ນໃນແຕ່ລະປີ ແລະ ປີນີ້ຈັດຂຶ້ນພາຍໃຕ້ຫົວຂໍ້ “5 ປີຕະຫຼາດຫຼັກຊັບລາວກ້າວສູ່ ເອອີຊີ” ງານນີ້ເປັນການເປີດກວ້າງໃຫ້ບັນດາພາກສ່ວນກ່ຽວຂ້ອງກັບຕະຫຼາດຫຼັກ ຊັບໄດ້ ມາວາງສະແດງຜົນງານ, ສິນຄ້າ, ການບໍລິການຂອງຕົນຕໍ່ມວນຊົນ ຊຶ່ງປະກອບມີທະນາຄານແຫ່ງ ສປປ ລາວ, ສຳນັກງານຄຸ້ມຄອງຫຼັກຊັບ, ຕະຫຼາດຫຼັກຊັບ ລາວ, ບໍລິສັດຫຼັກຊັບ, ບໍລິສັດຈົດທະບຽນ, ທີ່ປຶກສາ, ບໍລິສັດກວດສອບລວມເຖິງບັນດາຫົວໜ່ວຍທຸລະກິດທີ່ມີເປົ້າໝາຍຈະ ຈົດທະບຽນ ເພື່ອລະດົມທຶນຢູ່ຕະຫຼາດຫຼັກຊັບໄດ້ມາແນະນຳຜະລິດຕະພັນຂອງຕົນ ຕໍ່ສັງຄົມ.
ທີ່ສຳຄັນງານນີ້ຜູ້ເຂົ້າຮ່ວມຍັງໄດ້ຮັບຟັງການສົນທະນາແລກປ່ຽນ ຄຳຄິດເຫັນ ຈາກຄະນະຜູ້ບໍລິຫານຂອງບໍລິສັດຈົດ ທະບຽນ ແລະ ເປົ້າໝາຍຈົດທະບຽນໃນຫຼາຍໆຫົວຂໍ້ທີ່ລ້ວນແຕ່ກ່ຽວຂ້ອງກັບບົດ ຮຽນ, ປະສົບການໃນການລະດົມທຶນ, ຜົນປະໂຫຍດຈາກການຈົດທະບຽນ, ປະໂຫຍດຂອງທຸລະກິດໃນການເຂົ້າສູ່ປະ ຊາຄົມເສດຖະກິດອາຊຽນ, ການລົງທຶນຮຸ້ນ ແລະ ປະເດັນອື່ນໆທີ່ມີຄວາມສົນໃຈ.
ບໍ່ພຽງເທົ່ານີ້ເວທີດັ່ງກ່າວຍັງເປີດໂອກາດໃຫ້ຜູ້ທີ່ມີຄວາມ ສົນໃຈກໍຄືຢາກກ້າວເຂົ້າໄປເປັນນັກລົງທຶນ ເພື່ອແລກ ປ່ຽນຊື້-ຂາຍຮຸ້ນຢູ່ຕະຫຼາດຫຼັກຊັບລາວ ສາມາດຫາຄຳຕອບໃນບັນຫາຕ່າງໆທີ່ຍັງຄ້າງຄາໃຈ ໂດຍຜ່ານການສອບຖາມບັນດານັກວິຊາການຂອງບໍລິສັດຕ່າງໆອີກດ້ວຍ.
ໃນໂອກາດດັ່ງກ່າວນີ້ທ່ານ ວັນຄຳ ວໍຣະວົງ ປະທານຄະນະ, ຫົວໜ້າໃຫຍ່ຜູ້ບໍລິຫານຕະຫຼາດຫຼັກຊັບລາວ ຊຶ່ງມາ ຮັບຕຳແໜ່ງໃໝ່ໄດ້ມີຄຳເຫັນວ່າ: ຕົວເພິ່ນເອງພ້ອມແລ້ວທີ່ຈະສານຕໍ່ພາລະກິດ ແລະ ວິໄສທັດຂອງຕະຫຼາດຫຼັກຊັບ ລາວໃຫ້ປາກົດຜົນເປັນຈິງ ໂດຍສືບຕໍ່ເຮັດໃຫ້ຕະຫຼາດຫຼັກຊັບລາວກາຍເປັນທາງເລືອກໃໝ່ທີ່ມີ ປະສິດທິຜົນໃນການລະດົມທຶນສຳລັບບັນດາຫົວໜ່ວຍທຸລະກິດ, ເພີ່ມສະພາບຄ່ອງ ແລະ ສະໜອງການບໍລິການທີ່ມີຄວາມໂປ່ງໃສ, ຍຸຕິທຳຄຽງຄູ່ຄວາມທັນສະໄໝເຮັດໃຫ້ຕະຫຼາດຫຼັກຊັບລາວກາຍເປັນ ຕະຫຼາດທີ່ມີປະສິດທິພາບໃນການແຂ່ງຂັນເພື່ອຮອງຮັບການເຊື່ອມໂຍງ ກັບຕະຫຼາດຫຼັກຊັບແຫ່ງຕ່າງໆຂອງພາກພື້ນອາຊຽນໃນອະນາຄົດອັນໃກ້ ນີ້.
ງານເປີດໂລກແຫ່ງການລົງທຶນປະຈຳປີ 2015 ໄດ້ຈັດຂຶ້ນໃນວັນທີ 28 ກຸມພາຜ່ານມາ ທີ່ສຳນັກງານຕະຫຼາດຫຼັກຊັບລາວ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ, ມີບັນດາບໍລິສັດຫຼັກຊັບ, ບໍລິສັດຈົດທະບຽນ, ນັກລົງທຶນຕະຫຼອດຮອດນັກຮຽນນັກສຶກສາເຂົ້າຮ່ວມ.
ແຫລ່ງຂ່າວ: ເສດຖະກິດ – ສັງຄົມ