ຊາວອາເມຣິກັນຫລາຍລັດ ຕ້ອງປະເຊີນກັບອາກາດໜາວຈັດ ອຸນຫະພູມແຕະລະດັບ -40 ອົງສາໃນບາງພື້ນທີ່ ຂະນະທີ່ມີຊາວອາເມຣິກັນ ແລະ ການາດາ ເສຍຊີວິດແລ້ວ 26 ຄົນ ໃນອາທິດທີ່ຜ່ານມາ.
ສຳນັກຂ່າວຕ່າງປະເທດ ລາຍງານໃນວັນທີ 23 ກຸມພາຜ່ານມານີ້ວ່າ ສະຖານະການໄພໜາວທີ່ກຳລັງສົ່ງຜົນກະທົບຕໍ່ຊາວອາເມຣິກັນ ໃນຫລາຍລັດທາງພາກຕາເວັນອອກຂອງສະຫະລັດວ່າ ປະຊາຊົນໃນພື້ນທີ່ບາງສ່ວນຂອງລັດ ດາໂກຕາເໜືອ ແລະ ມິເນໂຊຕາ ຕ້ອງປະເຊີນກັບລົມໜາວຈັດ ລະດັບ -40 ອົງສາ ໃນວັນອາທິດທີ 22 ກຸມພາຜ່ານມາ ແລະ ລົມໜາວລະດັບ -20 ອົງສາ ພັດຜ່ານເມືອງຊິຄາໂກ ລັດອິລິນອຍ ໃນມື້ວັນຈັນທີ 23 ກຸມພາຜ່ານມາ ຕາມເວລາໃນທ້ອງຖິ່ນ.
ສະເພາະໃນມື້ນີ້ (24 ກຸມພາ) ຢູ່ລັດນິວຢອກ ແລະ ຟິລາເດເຟຍ ກໍຈະພົບກັບລົມໜາວລະດັບ -4 ອົງສາພັດຜ່ານ ເຊິ່ງນອກຈາກຈະມີລົມໜາວແລ້ວ ຍັງມີຫິມະຕົກໜັກໃນຫລາຍພື້ນທີ່ຂອງສະຫະລັດອາເມຣິກາອີກດ້ວຍ ເປັນເຫດເຮັດໃຫ້ມີຜູ້ເສຍຊີວິດໃນສະຫະລັດ ແລະ ການາດາ ເຊິ່ງລ່າສຸດມີລາຍງານຕາຍຍ້ອນອາກາດໜາວແລ້ວ 26 ຄົນ ໃນໄລຍະອາທິດທີ່ຜ່ານມາ.
